ՌԴ-ն միանշանակ կողմ է, որպեսզի ՇՀԿ-ի աշխատանքներում ակտիվորեն ներգրավվեն այլ երկրներ. Սերգեյ Կոպիրկին
3 րոպեի ընթերցում
Շանհայի համագործակցության կազմակերպությունը (ՇՀԿ) ի սկզբանե տարածաշրջանային կառույց էր, սակայն ժամանակի ընթացքում վերածվել է գլոբալ նշանակության գործոնի և եվրասիական հսկայածավալ տարածքում այժմ ունի աշխարհաքաղաքական և աշխարհատնտեսական էական դերակատարություն, ինչպես նաև մեծ նշանակություն միջազգային հարաբերություններում նոր համակարգի ձևավորման գործում։
«Արմենպրես»-ի հաղորդմամբ՝ այդ կարծիքը լրագրողների հետ զրույցում հայտնեց ՀՀ-ում ՌԴ արտակարգ և լիազոր դեսպան Սերգեյ Կոպիրկինը։
«ՇՀԿ-ի շրջանակում համագործակցությունն ի սկզբանե հիմնված է եղել այն հիմնարար սկզբունքների վրա, որոնք իսկապես ակտուալ են ժամանակակից աշխարհի համար։ Դրանք են փոխադարձ հարգանքը, անկախ քաղաքականության իրականացումը և պատրաստակամությունը՝ լուծելու առկա խնդիրները կոլեկտիվ ջանքերով և գտնելով բոլորի համար ընդունելի լուծման ուղիներ։ ՇՀԿ-ի շրջանակում համագործակցությունն ընդգրկում է տարաբնույթ ոլորտեր։ Մասնավորապես տնտեսության բնագավառում, ինչպես նշել է մեր նախագահը, չափազանց կարևոր նշանակություն ունի եվրասիական փոխգործակցությունը։ Մենք հանդես ենք գալիս գործողությունների համատեղ կոորդինացման օգտին ՇՀԿ-ի և ԵԱՏՄ-ի, մյուս տարածաշրջանային կազմակերպությունների միջև, ինչպիսիք են ԱՍԵԱՆ-ը և աֆրիկյան ազդեցիկ կազմակերպությունները»,- ասաց դեսպանը։
Կոպիրկինը հավելեց, որ Ռուսաստանի Դաշնության արտաքին քաղաքականության նոր հայեցակարգի մեջ, որն ընդունվել է 2023 թվականին, շատ կարևոր դեր ունի համագործակցությունը անվտանգության ոլորտում։
«ՇՀԿ-ում գործում է հակաահաբեկչական կառույցը, այժմ աշխատում ենք ավելի համապարփակ կենտրոն ստեղծելու նախագծի վրա, որի միջոցով հնարավոր կլինի ժամանակին արձագանքել անվտանգության հետ կապված մարտահրավերներին։ Այդ առումով կարևոր է, որ ՇՀԿ-ն համագործակցի տարածաշրջանային այլ կազմակերպությունների՝ մասնավորապես ՀԱՊԿ-ի հետ։ Մենք աշխատում ենք այդ առաջնահերթությունները կյանքի կոչելու ուղղությամբ»,- նշեց ՀՀ-ում ՌԴ դեսպանը։
Դիվանագետն ընդգծեց, որ ՌԴ-ն Չինաստանի հետ սերտորեն համագործակցում է տվյալ կառույցում՝ լինելով նախագահող երկիր ՇՀԿ-ի անդամ պետությունների կառավարությունների ղեկավարների կառույցում։
«Մենք աջակցում ենք չինական կողմի նախաձեռնություններին, որոնք ուղղված են համագործակցության ընդլայնմանը և այդ առումով միանշանակ կողմ ենք, որպեսզի կազմակերպության աշխատանքներում ակտիվորեն ներգրավվեն նաև այլ երկրներ, մասնավորապես Հայաստանը։ ՇՀԿ-ի հետ սերտ համագործակցությունն ինքնին հասկանալի է՝ հաշվի առնելով այն սկզբունքները, որոնցով առաջնորդվում է այս ազդեցիկ կազմակերպությունը։ Աշխատանքը համընկնում է նաև այն ընկալումների հետ, որոնք առնչվում են բազմաբևեռ աշխարհակարգի, իրավահավասար միջազգային հարաբերությունների կերտմանը, ինչը կարող է օգուտ բերել բոլոր շահագրգիռ կողմերին»,- եզրափակեց Կոպիրկինը։