Գերմանիան և ամբողջ Եվրոպան հետաքրքրություն ունեն «Խաղաղության խաչմերուկ» նախագծի իրագործման հարցում․ Շտայնմայեր

Գերմանիան և ամբողջ Եվրոպան մեծ հետաքրքրություն ունեն, որպեսզի Հայաստանը կարողանա իր «Խաղաղության խաչմերուկ» հավակնոտ ծրագիրը հաջորդող տարիներին զարգացնել և իրագործել, որով նաև նոր հաղորդակցային ուղիներ կստեղծվեն Եվրոպայի և Արևելյան Ասիայի միջև։  

«Արմենպրես»-ի հաղորդմամբ՝ այս մասին Գերմանիայի նախագահ Ֆրանկ-Վալտեր Շտայնմայերը հայտարարել է Հայաստանի նախագահ Վահագն Խաչատուրյանի հետ համատեղ մամուլի ասուլիսի ժամանակ՝ անդրադառնալով Հարավային Կովկասում հաղորդակցային ուղիների ապաշրջափակմանը՝ մասնավորապես Հայաստանի կառավարության կողմից ներկայացված «Խաղաղության խաչմերուկ» նախագծին։ 

«Ոչ միայն Գերմանիան, այլև ամբողջ Եվրոպան մեծ հետաքրքրություն ունեն, որպեսզի Հայաստանն այդ հավակնոտ «Խաղաղության խաչմերուկ» ծրագիրը հաջորդող տարիներին կարողանա զարգացնել և իրագործել, որով կստեղծվեն կոմունիկացիաներ Եվրոպայի և Արևելյան Ասիայի միջև՝ մերձեցնելով այս տարածաշրջանները։ Այս ամենը կապված է խաղաղության համաձայնագրի և դրա՝ հնարավորինս շուտ ստորագրման հետ»,-շեշտել է Գերմանիայի նախագահը։

Նա հավելել է՝ երբ խոսք է գնում ենթակառուցվածքների զարգացման մասին, անհրաժեշտ են միջազգային ներդրողներ, որոնք պատրաստ են ներդրումներ կատարել այդ ենթակառուցվածքների ստեղծման մեջ։ 

«Այս հարցում փոխադարձ կապ կա․ ինչքան մեծ է կայունությունը այս տարածաշրջանում, այնքան ավելի մեծ կլինի հավանականությունը այդպիսի ներդրողներ գտնելու հարցում»,-ընդգծել է Շտայնմայերը։