1 րոպեի ընթերցում
Լիտվայում փրկարարները փորձում են զորավարժության գոտում գտնվող տորֆային ճահճում գտնել երկու օր առաջ անհետացած չորս ամերիկացի զինվորներին։ «Արմենպրես»-ի փոխանցմամբ՝ այս մասին հաղորդում է Reuters-ը։
Հայտնի է, որ M88 Hercules զրահապատ մեքենայով զինվորները զորավարժություններ էին անցկացնում Բելառուսի սահմանի մոտ գտնվող Պաբրադե զորավարժարանում։
Լիտվայի պաշտպանության նախարար Դովիլե Շակալենեն տեղանքն ուսումնասիրելուց հետո լրագրողների հետ զրույցում նշել է, որ նրանց մեքենան խրվել է ճահճի մեջ՝ մոտ հինգ մետր խորությամբ։
Նախարարի խոսքով՝ գիշերվա ընթացքում մեծ աշխատանք է տարվել զրահամեքենայի խորտակման տարածքը չորացնելու համար, և կառուցվել է նոր ճանապարհ՝ ծանր տեխնիկայի մուտքը թույլ տալու համար:
«Մենք չենք կարող հաստատել, թե արդյոք մեքենայում զինվորականներ կան, թե ոչ», - հավելել է նա։
Շակալենեի խոսքով՝ մշտական կապ է պահպանվում ԱՄՆ դիվանագիտական կորպուսի հետ քաղաքական և ռազմական մակարդակներում։ Իրավիճակը, ըստ նախարարի, բավական ծանր է։
Հարյուրավոր լիտվացի և ամերիկացի զինվորներ տասնյակ մեքենաներով աշխատում են տեղում և ուսումնասիրում մոտակա անտառները՝ զինվորներին գտնելու հույսով:
