2 րոպեի ընթերցում
Ադրբեջանի հետ խաղաղությունն ու հարաբերությունների կարգավորումը բխում է Հայաստանի Հանրապետության շահերից:
«Արմենպրես»-ի հաղորդմամբ` այս մասին ասաց Հայաստանի արտաքին գործերի նախարար Արարատ Միրզոյանն ԱԺ արտաքին հարաբերությունների նիստում:
«Խաղաղությունը Հայաստանի Հանրապետության գոյության միակ ձևն է: Ադրբեջանի հետ խաղաղությունն ու հարաբերությունների կարգավորումը բխում է Հայաստանի Հանրապետության շահերից»,-ասաց Միրզոյանը:
Նա նշեց՝ կան հարցեր, որոնք կարգավորված են, կան հարցեր, որոնք դեռ պետք է կարգավորվեն:
«Անշուշտ կան հարցեր, որոնց իրենք այլ կերպ են նայում, մենք՝ այլ կերպ: Կան պահանջներ, որոնք իրենք ունեն, որ մենք չենք կիսում: Կան պահանջներ, ակնկալիքներ, որ մենք ունենք, իրենք չեն կիսում: Կան հարցեր, որ գուցե մինչև վերջ էլ աշխատենք միասին և կարգավորված չլինեն, օրինակ՝ անհայտ կորածների ճակատագրերի պարզաբանումը և այլն: Թնջուկը և բարդությունների խումբ իսկապես մեծ է: Բայց խաղաղությունն ընդհանրապես հեշտ գործընթաց չէ»,-ասաց ԱԳ նախարարը՝ ընդունելով, որ կան խնդիրներ:
Հայաստանն ու Ադրբեջանը մարտի 13-ին հայտարարել են, որ վերջնական համաձայնության են հասել խաղաղության պայմանագրի նախագծի տեքստի շուրջ։ Հայաստանի արտաքին գործերի նախարարությունը հայտարարել է, որ պատրաստ է Բաքվի հետ քննարկումներ սկսել պայմանագրի ստորագրման ժամկետների և վայրի վերաբերյալ։ Բազմաթիվ երկրներ արդեն ողջունել են Հայաստանի և Ադրբեջանի միջև համաձայնության ձեռքբերումը խաղաղության պայմանագրի տեքստի շուրջ և հույս են հայտնել, որ պայմանագիրը կստորագրվի հնարավորինս շուտ։