2 րոպեի ընթերցում
Իտալիայում ՀՀ նորանշանակ դեսպան Վլադիմիր Կարապետյանն իր հավատարմագրերն է հանձնել Իտալիայի Հանրապետության նախագահ Սերջո Մատարելլային:
«Արմենպրես»-ի փոխանցմամբ՝այս մասին հայտնում է Իտալիայում Հայաստանի դեսպանությունը:
«Հավատարմագրերի հանձնման պաշտոնական արարողությանը հաջորդած առանձնազրույցի ընթացքում Իտալիայի նախագահը շնորհավորեց դեսպանին պաշտոնը ստանձնելու կապակցությամբ և հաջողություն մաղթեց նրան առաքելության իրականացման ընթացքում: Նախագահը հույս հայտնեց, որ դեսպան Կարապետյանն իր ակտիվ գործունեությամբ էլ ավելի կամրապնդի հայ-իտալական երկկողմ բարեկամական հարաբերությունները` միաժամանակ իր աջակցությունը հայտնելով դեսպանին իր առաքելության ընթացքում»,- հաղորդել է դեսպանությունը:
Շնորհակալություն հայտնելով ջերմ ընդունելության համար՝ դեսպան Կարապետյանը նախագահ Սերջո Մատարելլային փոխանցել է ՀՀ նախագահ Վահագն Խաչատուրյանի ջերմ ողջույնները` ընդգծելով, որ Հայաստանը մեծապես շահագրգիռ է Իտալիայի հետ փոխադարձ հետաքրքրություն ներկայացնող բոլոր ոլորտներում սերտ համագործակցության ամրապնդմամբ: Զրույցի ընթացքում դեսպանն Իտալիայի նախագահին ներկայացրել է Հայաստանում ժողովրդավարության և դրա ինստիտուտների ամրապնդման ուղղությամբ կառավարության կողմից ձեռնարկվող քայլերը, Հայաստանի կառավարության կողմից ներդրվող ջանքերը՝ խաղաղ գործընթացն առաջ մղելու ուղղությամբ:
Երկուստեք կարևորվել է երկկողմ տնտեսական հարաբերություններին նոր խթան հաղորդելու անհրաժեշտությունը։
Դեսպան Կարապետյանը վստահեցրել է, որ իր պաշտոնավարման ընթացքում հնարավոր բոլոր ջանքերը կներդնի՝ հայ-իտալական բարեկամական հարաբերությունները և առկա համագործակցությունը առավել խորացնելու ու ամրապնդելու ուղղությամբ: