ՀՀ ԱԺ պատգամավորը ԵԱՀԿ ԽՎ–ում ունեցած իր ելույթում շեշտել է Հայաստանի հանձնառությունը խաղաղությանը
3 րոպեի ընթերցում
Փակ սահմանների հասցեագրումը և Ադրբեջանի հետ խաղաղության հաստատումն առավել անվտանգ ու փոխկապակցված տարածաշրջան կառուցելու Հայաստանի ջանքերի առանցքային սյուներն են:
«Արմենպրես»-ի փոխանցմամբ՝ Վիեննայում ընթացող ԵԱՀԿ ԽՎ ձմեռային նստաշրջանի քաղաքական եւ անվտանգային հարցերի հանձնաժողովի նիստում իր ելույթում այս մասին ընդգծել է Հայաստանի ԱԺ պատվիրակության անդամ Լիլիթ Մինասյանը:
«Հայաստանը հավատարիմ է մի արտաքին քաղաքականության, որն առաջնահերթություն է տալիս խաղաղությանը, համագործակցությանը, մեր ինքնիշխանության եւ ժողովրդավարության ամրապնդմանը:
Այս համատեքստում փակ սահմանների հասցեագրումը եւ Ադրբեջանի հետ խաղաղության հաստատումն առավել անվտանգ ու փոխկապակցված տարածաշրջան կառուցելու մեր ջանքերի առանցքային սյուներն են»,–նշել է Մինասյանը:
Նա հիշեցրել է՝ անցյալ տարի Հայաստանն ու Ադրբեջանը ստորագրել են երկու երկրների պետական սահմանի սահմանազատման հանձնաժողովների համատեղ գործունեության կանոնակարգ սահմանազատման գործընթացը՝ հիմքում ունենալով Ալմա-Աթայի հռչակագիրը:
«Հայաստանի Սահմանադրական դատարանը հաստատել է, որ այս որոշումը լիովին համապատասխանում է մեր Սահմանադրությանը: Կանոնակարգը վավերացվել է Հայաստանի խորհրդարանի եւ Ադրբեջանի նախագահի կողմից: Այն Հայաստանի եւ Ադրբեջանի միջեւ առաջին միջպետական փաստաթուղթն է:
Ադրբեջանի հետ վերջնական հարաբերությունների կարգավորման պայմանագիրը պատմական ձեռքբերում կլինի:
Խաղաղության պայմանագրի նախագծի 17 կետերից մենք լիովին համաձայնության ենք եկել 15-ի վերաբերյալ: Մնացած երկու կետերի վերաբերյալ ներկայացրել ենք կառուցողական առաջարկներ եւ սպասում ենք ադրբեջանական կողմի դրական արձագանքին»,–ասել է Մինասյանը:
Պատգամավորը հավելել է՝ դա ոչ միայն կփոխի երկու երկրների հարաբերություններն, այլեւ կբացի նոր հնարավորություններ տարածաշրջանային համագործակցության համար՝ առեւտրի, տրանսպորտի եւ էներգետիկայի ոլորտներում:
«Այնուամենայնիվ, երբ մենք առաջընթաց ենք գրանցում խաղաղության բանակցություններում, մենք հավատում ենք, որ սահմանների բացումը կդառնա կայուն խաղաղության բնական երաշխիքը»,–նշել է նա:
Մինասյանը տեղեկացրել է նաև, որ Հայաստանի Հանրապետությունն Ադրբեջանին գրավոր առաջարկ է ներկայացրել Հայաստանի տարածքով՝ Ադրբեջանից Ադրբեջան եւ միջազգային, Ադրբեջանի տարածքով՝ Հայաստանից Հայաստան եւ միջազգային երկաթուղային փոխադրումներ իրականացնելու մասին ու սպասում է Ադրբեջանի դրական արձագանքին:
«Եվ վերջում, թույլ տվեք կրկնել Հայաստանի հանձնառությունը խաղաղությանը, կայունությանը եւ տարածաշրջանային համագործակցությանը: Միասին մենք կարող ենք կառուցել ապագա, որտեղ սահմանները խաչմերուկներ են, որտեղ հակամարտությունները լուծվում են երկխոսության միջոցով եւ որտեղ մեր տարածաշրջանի ժողովուրդը կարող է բարգավաճել խաղաղության եւ անվտանգության պայմաններում»,–եզրափակել է Մինասյանը:
