Անսահման ուրախ էի կրկին հանդիպել երախտագետ հայ հանդիսատեսի հետ. Դմիտրի Մասլեև

5 րոպեի ընթերցում

Օրերս ականավոր դաշնակահար, բազմաթիվ հեղինակավոր միջազգային մրցույթների մրցանակակիր, այդ թվում Չայկովսկու 15-րդ միջազգային մրցույթի առաջին մրցանակակիր և ոսկե մեդալակիր Դմիտրի Մասլեևը ելույթ է ունեցել Երևանում:

«Արմենպրես»-ի հաղորդմամբ՝ համերգին, որ տեղի է ունեցել օրեր առաջ «Արամ Խաչատրյան›› համերգասրահում, Մասլեևը հանդես է եկել Հայաստանի ազգային ֆիլհարմոնիկ նվագախմբի հետ՝ գեղարվեստական ղեկավար և գլխավոր դիրիժոր Էդուարդ Թոփչյանի ղեկավարությամբ:

Մասլեևի կատարմամբ հնչել են Սերգեյ Ռախմանինովի Դաշնամուրի թիվ 3 կոնցերտը: Նրա ելույթը մեծ ոգևորությամբ է ընդունել երևանյան հանդիսատեսը: 

Ռախմանինովի Դաշնամուրի թիվ 3 կոնցերտը այս ժանրի ամենածավալուն, վառ ու տպավորիչ ստեղծագործություններից է: Այն հանդիսանում է Ռախմանինովի 1900-ականների կոմպոզիտորական արվեստի գագաթը, որն ամփոփում է նրա ստեղծագործական փնտրտուքների այդ շրջանը: Այստեղ Ռախմանինովի ստեղծագործական ինքնատիպ անհատականությունը կրկին արտահայտվում է իր ողջ հզորությամբ և անկրկնելի պոետիկ հմայքով: Մասլեևն աչքի է ընկել փայլուն, վիրտուոզ կատարմամբ, ինչպես նաև նուրբ, քնարական մեկնաբանությամբ: Դաշնակահարին հաջողվել է ունկնդրին հասցնել էմոցիոնալ բարձր լարվածության և գեղագիտական վայելքի գագաթնակետին, ինչից հետո դահլիճը երկար ու հոտընկայս ծափահարել է: 

Մասլևն ավելի թեժացրել է մթնոլորտը և որպես բիս կատարել Գրիգ-Գինսբուրգ՝ «Լեռան արքայի քարանձավում» ինքնատիպ, միստիկ ու գրոտեսկային ստեղծագործությունը «Պեր Գյունտ» սյուիտից, որն ուղղակի հրավառության պես փայլատակել է «Արամ Խաչատրյան» համերգասրահում:

Դմիտրի Մասլեևը համերգից հետո նշել է. «Արդեն երկրորդ անգամ եմ ելույթ ունենում Հայաստանի ազգային ֆիլհարմոնիկ նվագախմբի հետ: Շատ տպավորված եմ նրանով, թե երաժիշտները որքան նրբորեն են զգում մենակատարի մեկնաբանության մտադրությունները և որքան արագ ու նրբացգաց են արձագանքում: Անսահման ուրախ էի կրկին հանդես գալ այս հոյակապ համերգասրահում և հանդիպել երախտագետ հայ հանդիսատեսի հետ: Անհամբեր կսպասեմ հաջորդ ելույթիս»:

Համերգի երկրորդ բաժնում սպասվել է տիեզերական ճանապարհորդություն՝ երաժշտության և տեսապատկերների միջոցով: Հնչել է Գուստավ Հոլսթի «Մոլորակներ» մոնումենտալ սիմֆոնիկ սյուիտը՝ բաղկացած 7 մասից, որից յուրաքանչյուրը նվիրված է Արեգակնային համակարգի մոլորակներին, որոնք տեսանելի են Երկրից՝ Մարս, Վեներա Մերկուրի, Յուպիտեր, Սատուրն, Ուրան և Նեպտուն: Հոլսթի «Մոլորակներ»-ը Թոփչյանի մեկնաբանությամբ հառնել է որպես մեծ, գունեղ ու կատարյալ սիմֆոնիկ կտավ, որը դեռ երկար կմնա մեծապես տպավորված հանդիսատեսի մտապատկերում:

Համերգի հաջորդ օրը Դմիտրի Մասլեևը «Արամ Խաչատրյան» համերգասրահի նորաբաց «Հարմոնիկ» սրահում վարպետության դաս և կլոր սեղանի շուրջ քննարկում է անցկացրել երիտասարդ դաշնակահարի հետ: 

Մասլեևը նաև Primavera Foundation of Armenia մշակութային հիմնադրամի դաշնամուրայն ծրագրի ղեկավարն է: Հիմնադրամի նախաձեռնությամբ՝ նա պարբերաբար անվճար վարպետության դասեր է անցկացնում Հայաստանում: Այս անգամ դաշնակահարը երիտասարդների հետ աշխատել է Ռախմանինովի, Շումանի և Պրոկոֆևի ստեղծագործությունների վրա՝ բացահայտելով կատարողական վարպետության գաղտնիքներ, ոգեշնչելով նրանց ձգտել նորանոր նվաճումների: Մասլեևը շեշտել է՝ շատ ոգևորիչ է եղել տեսնել երիտասարդների մեծ հետաքրքրությունը վարպետության դասերի հանդեպ։ «Այս անգամ 5 տեղի համար 17 դիմում կար, հայտ էր ներկայացվել անգամ Իրանից, ընտրվելու դեպքում դաշնակահարը պատրաստ էր ժամանել Երևան: Տպավորված եմ մասնակիցների բարձր մասնագիտական ​​մակարդակով։ Եվ ամենակարևորը՝ նրանք մեծ նվիրում ունեն, «վառվում» են իրենց գործով և անում են իրենց լավագույնը»,-ընդգծել է երաժիշտը։

Դիտրի Մասլեևին ներկայացնելիս France Musique-ը նրան որակել է որպես «սուպեր-սոլիստ», իսկ հեղինակավոր The Diapason ամսագիրը Ֆրանսիայի ազգային նվագախմբի հետ ելույթը ներկայացրել է որպես «Մասլեևի տրիումֆ», որտեղ դաշնակահարը կատարել է Չայկովսկու Դաշնամուրի թիվ 1 կոնցերտը։

 

 

Հայերեն

Հայաստանն ու Եգիպտոսը քննարկել են առևտրի ոլորտում համագործակցությունը խորացնելու հեռանկարները

Հայաստանի պատմության թանգարանն ու Աթենքի ազգային հնագիտական թանգարանը համատեղ ցուցահանդեսներ կիրականացնեն

Վահան Կոստանյանը հանդիպել է ՄԱԿ-ի գլխավոր քարտուղարի՝ Սիրիայի հարցերով հատուկ բանագնացի տեղակալի հետ

ՀՀ պաշտպանության նախարարի տեղակալն այցելել է մի շարք զորամասեր

Ռազմական ոստիկանության պետն աշխատանքային խորհրդակցություն է անցկացրել

Հրապարակվել են նոյեմբերի 29-ին կայանալիք ՏԻՄ ընտրությունների վերջնական ցուցակները

Հայաստանում առաջիկա օրերին սպասվում են տեղումներ, օդի ջերմաստիճանը զգալիորեն կնվազի

Արմավիրի մարզի մի շարք բնակավայրերում փորձարկվելու են էլեկտրական շչակներ

Փրկարարներն արձագանքել են քամու հետևանքով գրանցված դեպքերին

Վահան Կոստանյանը Նեապոլում հանդիպել է Իտալիայի խորհրդարանի արտաքին հարաբերությունների հանձնաժողովի նախագահի հետ