Ծանրորդ Ռաֆիկ Հարությունյանը նորմալ է համարում մեկամսյա մարզումներից հետո Հայաստանի առաջնությունում գրանցած արդյունքը
2 րոպեի ընթերցում
Հայաստանի ծանրամարտի առաջնության չեմպիոն Ռաֆիկ Հարությունյանը մտադիր է բարձրացնել քաշային կարգը:
«Մոտ մեկ ամիս է, ինչ սկսել եմ նորից մարզվել, քանի որ նախորդ տարի`աշխարհի առաջնությունից առաջ, ծանր վնասվածք ստացա, որի պատճառով չկարողացա մասնակցել աշխարհի առաջնությանը: Մոտ երկու ամիս է՝ բուժվում էի: Կարծում եմ՝ մեկ ամիս մարզվելու համար նորմալ արդյունք է Հայաստանի առաջնությունում»,- «Արմենպրես»-ի հաղորդմամբ` լրագրողների հետ զրույցում ասաց Հարությունյանը:
Վերջինիս խոսքով` Հայաստանի առաջնությունում գրանցած արդյունքը բավարար չէ ապրիլին կայանալիք Եվրոպայի առաջնության համար:
«Դեռևս երկու ամիս կա Եվրոպայի առաջնությանը: Փորձելու եմ ավելի մոտենալ նախկինում իմ բարձրացրած կիլոգրամներին, որոնցով հաղթել եմ ու դարձել մեդալակիր»,- ասաց նա:
Ծանրորդն ընդգծեց, որ ծանրամարտում լինում են վնասվածքներ, որոնք դժբախտաբար, միշտ մնում եմ մարզիկի հետ, խնդիրը մարզիկի բնավորության ու օրգանիզմի դիմադրողականության մեջ է:
«Մեծ է հավանականությունը, որ կսկսեմ հանդես գալ ավելի բարձր քաշային կարգում: Սպորտային տեսանկյունից ավելի լավ է բարձրանալ, քանի իջնել, այդ դեպքում վնասվածքների հավանականությունն էլ քիչ է»,- ասաց Հարությունյանը:
Հայաստանի ծանրամարտի տղամարդկանց ընտրանին փետրվարի 14-ից կսկսի մարզական հավաքը Ծաղկաձորում: