Խոշոր ջերմատնային տնտեսություններ հիմնել ցանկացող շահառուներին մինչև 15 մլրդ դրամ սուբսիդավորվող վարկ կտրամադրվի
3 րոպեի ընթերցում
Հայաստանի կառավարությունը փետրվարի 6-ի նիստում խոշոր ջերմատնային տնտեսություններ հիմնելու և դրա համար շահառուներին առավելագույնը 15 միլիարդ դրամ սուբսիդավորվող վարկ տրամադրելու նախագիծ ընդունեց, որը յուրաքանչյուր շահառուին հնարավորություն է տալու մինչև 20 հեկտար տարածքով ջերմատուն հիմնել ։
«Արմենպրես»-ի հաղորդմամբ՝ Հայաստանի էկոնոմիկայի նախարար Գևորգ Պապոյանի խոսքով՝ նախագծի մշակումն ու ընդունումը պայմանավորված է ինտենսիվ գյուղատնտեսության, մասնավորապես՝ ջերմատնային տնտեսությունների զարգացման ոլորտում խոշոր ներդրումների ներգրավման, ինչպես նաև պետական աջակցության ծրագրի շրջանակներում համանման քաղաքականության մշակման և իրականացման անհրաժեշտությամբ։
Նախարարի դիտարկմամբ՝ ըստ իրականացված ուսումնասիրությունների՝ ՀՀ-ում առկա է շուրջ 1500 հեկտար ջերմոց և ջերմատուն: Դրանցից 250 հեկտարը գործում է ժամանակակից տեխնոլոգիաներով: Կառավարության վերոնշյալ որոշումը վերաբերում է հենց ժամանակակից տեխնոլոգիաներով ջերմատների հիմնմանը։
Գևորգ Պապոյանը նկատեց՝ 2019-2024 թվականներին ջերմատնային տնտեսություններին աջակցության ծրագրի շրջանակներում հաստատվել է 56 հեկտար ջերմատուն հիմնելու հայտ, որից ՝ 15,3 հեկտարը ն ընդգրկվել է ջերմատնային տնտեսությունների զարգացման աջակցության ծրագրում։
Նրա խոսքով՝ ծրագրի թիրախային ցուցանիշ է սահմանված մինչև 2026 թվականի ավարտը 35 հեկտար ժամանակակից տեխնոլոգիաներով ջերմատների հիմնումը։
«Գործող ջերմատնային տնտեսությունների ծրագրով տրամադրվող աջակցությունը նպաստում է շուրջ 4-5 հեկտար տարածքով ջերմատների հիմնմանը, քանի որ տրամադրվում է առավելագույնը 3 միլիարդ դրամի վարկ։ Ավելի խոշոր ներդրումային ծրագրեր իրականացնող շահառուների համար, գործող աջակցության գործիքը, հնարավորություններ չի ընձեռում»,-ասաց նախարարը։
Պապոյանը նաև նշեց, որ նախագծով հնարավորություն է ստեղծվում խոշոր ջերմատնային տնտեսություններ հիմնել և դրա համար շահառուներին տրամադրել մինչև 15 միլիարդ դրամ սուբսիդավորվող վարկ, որը հնարավորություն է տալու մեկ շահառուին հիմնել մինչև 20 հեկտար տարածքով ջերմատուն: Էկոնոմիկայի նախարարությունն այս պահին էլ ունի հայտեր։
«Տրամադրված վարկի մինչև 3 միլիարդ դրամ գումարի մասնաբաժինը կսուբսիդավորվի գործող 10 տոկոսային կետով, 3-9-ը միլիարդ դրամի մասնաբաժինը՝ 9 տոկոսային կետով և 9-15 միլիարդ դրամի մասնաբաժինը՝ 8 տոկոսային կետով»,-մանրամասնեց նախարարը։
Նրա դիտարկմամբ՝ նախագծի ընդունումը կխթանի խոշոր ջերմատնային տնտեսությունների կառուցումը և կավելացնի դրանց արտադրանքի ու արտահանման քանակը։