Բաբկեն Թունյանը հերքում է լուրերը, թե եկամուտների հայտարարագրման համակարգի ներդրման համատեքստում բանկային գաղտնիքը վերացվել է

Հայաստանի Ազգային ժողովի պատգամավոր Բաբկեն Թունյանը հերքում է տարածվող լուրերը, թե եկամուտների հայտարարագրման կոնտեքստում պետական կառույցներն ու դրանց աշխատակիցները կարող են ստանալ ցանկացած տեղեկատվություն քաղաքացիների բանկային հաշվի վերաբերյալ։ 

«Արմենպրես»-ի փոխանցմամբ՝ Թունյանն այդ մասին գրել է «Ֆեյսբուք»-ի իր էջում։ 

«Եկամուտների հայտարարագրման համակարգի մասին խոսելիս՝ որոշ մարդիկ ապատեղեկատվություն են տարածում, թե բանկային գաղտնիքը վերացվել է, և պետական կառույցներն ու դրանց աշխատակիցները կարող են ստանալ ցանկացած տեղեկատվություն ձեր բանկային հաշվի վերաբերյալ: 

ՆՄԱՆ ԲԱՆ ՉԿԱ

Պետությունը, պետական կառույցները ձեր բանկային հաշիվներին հասանելիություն չունեն:

Պետությունը չի տեսնում՝ ձեզ ով է գումար փոխանցել կամ դուք ում եք փոխանցել:

Պետությունը չի տեսնում՝ ձեզ քանի անգամ կամ երբ են գումար փոխանցել կամ դուք քանի անգամ եք փոխանցել:

Պետությունը չի տեսնում՝ ամեն անգամ ձեզ որքան գումար են փոխանցել կամ դուք որքան եք փոխանցել:

Պետությունը չի տեսնում ձեր հաշվի մուտքերի կամ ելքերի նպատակները:

Ի՞նչ է տեսնում պետությունը (տվյալ դեպքում ՊԵԿ-ը):

Բանկից ստանում է ընդամենը 2 թիվ. ձեր հաշիվներին տարվա ընթացքում կատարված դրամական մուտքերի հանրագումարը և ելքերի հանրագումարը:

Ձեր բանկային հաշվի վերաբերյալ ցանկացած այլ տվյալի պետությունը կարող է հասանելիություն ունենալ միայն ձեր համաձայնությամբ (եթե դուք անհրաժեշտության դեպքում տրամադրեք քաղվածքը) կամ դատարանի որոշմամբ»,- գրել է պատգամավորը:

Հայաստանում բոլոր աշխատող քաղաքացիները պետք է մինչև 2025 թվականի մայիսի 1-ը պետք է ներկայացնեն իրենց եկամուտների հայտարարագիրը։ Անձնական փոխանցումները հայտարարագրելու կարիք չի լինի, եթե մեկ գործարքը չի գերազանցի 300 հազար դրամը։ 300 հազար դրամը գերազանցելու դեպքում անձնական փոխանցումները հայտարարագրվելու է, սակայն չի հարկվելու։