2 րոպեի ընթերցում
Բրյուսելը և Լոնդոնը պատասխան քայլեր են պատրաստել այն դեպքում, եթե ԱՄՆ նախագահ Դոնալդ Թրամփի վարչակազմը որոշի բարձրացնել մաքսատուրքերը ԵՄ-ից և Մեծ Բրիտանիայից ներկրվող ապրանքների նկատմամբ: «Արմենպրես»-ի փոխանցմամբ՝ այս մասին հաղորդում է POLITICO հրատարակությունը:
Ըստ հրապարակման՝ ինչ վերաբերում է առևտրին, ապա Բրյուսելը և Լոնդոնը մի շարք միջոցներ են պատրաստել առևտրային պատերազմի դեպքում։
Ըստ հրատարակության աղբյուրների՝ եվրոպացի և բրիտանացի պաշտոնատար անձինք հույս ունեն, թե իրենց, այնուամենայնիվ, կհաջողվի Թրամփին համոզել մաքսատուրքեր չսահմանել։ Միևնույն ժամանակ նրանք «պատրաստել են պատասխան միջոցների մի շարք, այդ թվում՝ մաքսատուրքեր ԱՄՆ-ից ներկրվող ապրանքների համար»։
Երդմնակալության արարողության օրը՝ հունվարի 20-ին, Թրամփը հայտարարեց արտաքին եկամուտների ծառայություն ստեղծելու պլանների մասին, որը կկարգավորի Միացյալ Նահանգներ ներկրվող ապրանքների նկատմամբ մաքսատուրքերը: Նա նաև նշել է, որ մտադիր է բարձրացնել Կանադայից և Մեքսիկայից ապրանքների ներմուծման մաքսատուրքերը և լրացուցիչ մաքսատուրքեր սահմանել չինական ապրանքների համար։
Նա նաև հայտարարել էր, որ կարող է մաքսատուրքեր սահմանել ԵՄ երկրների դեմ, եթե նրանք չմեծացնեն ամերիկյան նավթի և գազի գնումների ծավալները։