2 րոպեի ընթերցում
Վրաստանի վարչապետ Իրակլի Կոբախիձեն Վրաստանի և Ադրբեջանի միջև տնտեսական համագործակցության միջկառավարական հանձնաժողովի 10-րդ նիստին մասնակցության նպատակով հունվարի 17-ին այցելել է Բաքու։
Ինչպես հաղորդում է «Արմենպրես»-ը, այս մասին հայտնում են ադրբեջանական ԶԼՄ-ները։
Կոբախիձեն այցի շրջանակներում հանդիպել է Ադրբեջանի վարչապետ Ալի Ասադովի հետ։
«Արդյունավետ քննարկումներ եմ անցկացրել Ադրբեջանի վարչապետ պարոն Ալի Ասադովի հետ։ Մենք քննարկել ենք վրաց-ադրբեջանական երկկողմ համագործակցության հետագա խորացման հեռանկարները փոխադարձ հետաքրքրություն ներկայացնող ոլորտներում։ Մենք ընդգծել ենք առևտրատնտեսական և էներգետիկ համագործակցության ընդլայնման կարևորությունը։ Մեր ռազմավարական գործընկերությունը կարևոր դեր է խաղում տարածաշրջանային կայունության և մեր գործընկերների համար անվտանգ հաղորդակցությունների ապահովման տեսանկյունից»,- Ասադովի հետ հանդիպումից հետո X-ի իր միկրոբլոկում գրել է Կոբախիձեն։
Վրաստանի և Ադրբեջանի միջև տնտեսական համագործակցության միջկառավարական հանձնաժողովի 10-րդ նիստում Վրաստանի վարչապետը հայտարարել է, որ Վրաստանը մեծ նշանակություն է տալիս Ադրբեջան-Թուրքիա-Վրաստան եռակողմ համագործակցության ձևաչափին։
«Անկասկած, այս մեխանիզմի հաջող գործունեությունը տարբեր ուղղություններով էլ ավելի մեծ օգուտ կբերի մեր ընդհանուր շահերին։ Մեր երկրները սերտորեն համագործակցում են պաշտպանության, մշակույթի, կրթության, շրջակա միջավայրի պաշտպանության, գյուղատնտեսության, առողջապահության, զբոսաշրջության և մաքսային ոլորտներում։ Մենք մեր պատրաստակամությունն ենք հայտնում այս ոլորտներում էլ ավելի զարգացնելու և խորացնելու համագործակցությունը։ Այսօր մենք հնարավորություն կունենանք քննարկելու մեր ոլորտային համագործակցության հեռանկարներն ու նախաձեռնությունները»,-ասել է Իրակլի Կոբախիձեն։