2 րոպեի ընթերցում
Հայաստանի ազգային ժողովի տնտեսական հարցերի մշտական հանձնաժողովը հավանություն տվեց Հայաստանի կառավարության և Ամերիկայի Միացյալ Նահանգների կառավարության միջև մաքսային մարմինների փոխադարձ օգնության վերաբերյալ համաձայնագրի վավերացմանը:
«Արմենպրես»-ի փոխանցմամբ՝ «Հայաստանի Հանրապետության կառավարության և Ամերիկայի Միացյալ Նահանգների կառավարության միջև իրենց մաքսային մարմինների փոխադարձ օգնության վերաբերյալ» համաձայնագիրը վավերացնելու մասին օրենքի նախագիծը հանձնաժողովի նիստում ներկայացրեց ՀՀ պետական եկամուտների կոմիտեի նախագահի տեղակալ Ռաֆայել Գևորգյանը:
Գևորգյանը հիշեցրեց, որ անցյալ տարվա հունիսի 11-ին Հայաստանի կառավարությունը և ԱՄՆ-ն կնքեցին համապատասխան պայմանագիր, որով մաքսային մարմինները տեղեկատվության փոխանակման որոշակի ռեժիմ կունենան:
«Սա կարևոր ձեռքբերում է թափանցիկության խթանման և տեղեկատվության փոխանակման ոլորտում: Սրանով չի սահմանափակվում ՀՀ-ի մաքսային ծառայության և ԱՄՆ-ի մաքսային ծառայության և այլ գերատեսչությունների համագործակցությունը: Տվյալների փոխանակումից բացի ԱՄՆ կառավարության հետ նաև մեծ վերազինման նախագծեր ունենք: Այդ բոլոր գործընթացները պատշաճ կերպով առաջ են գնում»,-ասաց Գևորգյանը:
Նա հույս հայտնեց, որ այս տարի որոշակի սահմանային անցման կետերում էական բարելավումներ կլինեն՝ նաև օգտագործելով ԱՄՆ կառավարության տրամադրած աջակցությունը: