1 րոպեի ընթերցում
ԵՐԵՎԱՆ, 7 ՀՈՒՆՎԱՐԻ, ԱՐՄԵՆՊՐԵՍ: Չինաստանի հարավ-արևմուտքի Տիբեթի Ինքնավար Մարզում (ՏԻՄ) երկրաշարժի հետևանքով զոհերի թիվը հասել է 95-ի, 130-ը վնասվածքներ է ստացել։ «Արմենպրես»-ի փոխանցմամբ՝ այդ մասին հայտնում է Չինաստանի կենտրոնական հեռուստատեսությունը։ Ավելի վաղ Xinhua գործակալությունը հայտնել էր առնվազն 53 զոհվածի և 62 վիրավորի մասին։
Սեյսմիկ ակտիվությունը հանգեցրել է բազմաթիվ ենթակառուցվածքային օբյեկտների ավերման։ Տեղում իրականացվում են լայնածավալ որոնողափրկարարական աշխատանքներ։ Մարդիկ տարհանվել են աղետի գոտու առավել վտանգավոր շրջաններից։ ՉԺՀ-ի նախագահ Սի Ծինփինը կարգադրել է գործադրել առավելագույն ջանքերն այդ տարերային աղետի հետևանքների վերացման համար: