Նորանշանակ մարզպետը խոստանում է Շիրակում ամրապնդել երկիրը համաչափ զարգացնելու կառավարության ուղին

ԵՐԵՎԱՆ, 19 ԴԵԿՏԵՄԲԵՐԻ, ԱՐՄԵՆՊՐԵՍ: Շիրակի նորանշանակ մարզպետ Դավիթ Առուշանյանը խոստանում է կառավարության՝ երկիրը համաչափ զարգացնելու ուղին փորձել շարունակել ու ամրապնդել Շիրակում: 

«Արմենպրես»-ի հաղորդմամբ՝ Առուշանյանը պաշտոնում նշանակվելու առիթով ողջույնի խոսք է հղել:

«Մեծ պատասխանատվությամբ ու սիրով եմ սկսելու աշխատանքը իմ հայրենի մարզում, ինչպես նախորդ շրջանում, այնպես էլ հիմա՝ ծառայելու եմ հանուն մեր երկրի զարգացման ու հզորացման։ Վստահ եմ, որ սրտացավ ու արհեստավարժ մարդկանց հետ կկարողանանք լուծել շատ խնդիրներ ու բարօրություն բերել մեր մարզի բնակիչներին»,–նշել է մարզպետը:

Նա ևս մեկ անգամ իր խորին շնորհակալությունն է հայտնել ՀՀ վարչապետ Նիկոլ Փաշինյանին՝ վստահության ու հավատի համար, նաև կառավարության անդամներին։ 

«Շիրակը մեծ պոտենցիալ ունեցող ու զարգացման լայն հեռանկարներով մարզ է, և այն ուղին, որն ունի մեր կառավարությունը, այն է՝ համաչափ զարգացնել մեր երկիրը, կփորձեմ շարունակել ու ամրապնդել Շիրակում, իհարկե վստահելի թիմի, գործընկերների հետ։ 

Շնորհակալ եմ բոլոր շիրակցիներին, թե´ խորհրդարանական ընտրություններում, թե´ Գյումրու քաղաքապետի թեկնածուի ընտրություններում ինձ վստահության հաստատուն քվե տալու համար։ 

Միասին` հանուն մեր մարզի, հանուն մեր հայրենիքի»,–եզրափակել է Առուշանյանը:

Դավիթ Առուշանյանը Շիրակի մարզպետ է նշանակվել դեկտեմբերի 19–ին: նախագիծը ներառված էր կառավարության դեկտեմբերի 19-ի նիստի  չզեկուցվող հարցերի փաթեթում։