368.52
Եվրասիական երկրների աշխատանքի տեսչական կառույցների տարածաշրջանային դաշինքը Երևանում ամփոփեց 2024 թվականի աշխատանքները
2 րոպեի ընթերցում
ԵՐԵՎԱՆ, 13 ԴԵԿՏԵՄԲԵՐԻ, ԱՐՄԵՆՊՐԵՍ: Երևանում դեկտեմբերի 13-ին անցկացվեց Եվրասիական երկրների աշխատանքի տեսչական կառույցների տարածաշրջանային դաշինքի՝ 2024 թվականի ամփոփիչ համաժողովը։
«Արմենպրես»-ի հաղորդմամբ՝ մասնակիցներն ամփոփեցին այս կառույցում Հայաստանի նախագահության տարվա արդյունքները, քննարկեցին կատարած աշխատանքները, նշմարեցին հետագա անելիքները։
ՀՀ առողջապահության և աշխատանքի տեսչական մարմնի ղեկավար Սլավիկ Սարգսյանն «Արմենպրես»-ի թղթակցին հայտնեց, որ ընդհանուր առմամբ դրական է գնահատում այս կառույցում Հայաստանի նախագահության տարին։
«Քննարկեցինք տարվա ընթացքում նախատեսված ծրագրերի և գործողությունների կատարման ընթացքը։ Յուրաքանչյուր երկիր ներկայացրեց իր մասով կատարած օրենսդրական փոփոխությունները և կատարած աշխատանքները։ Քննարկեցինք նաև մեր հետագա գործողությունների ծրագիրը։ Այս տարի կառույցի շրջանակում նոր որոշումներ չեն կայացվել։ Հայաստանի նախագահությունը համարում եմ դրական։ Կարծում եմ՝ կազմակերպության անդամները դժգոհ չեն մեր նախագահությունից»,- նշեց Սլավիկ Սարգսյանը։
Հայաստանը երրորդ անգամ էր նախագահում Եվրասիական երկրների աշխատանքի տեսչական կառույցների տարածաշրջանային դաշինքում։
2024 թվականի ամփոփիչ համաժողովին մասնակցեցին Հայաստանի, Բելառուսի, Ղազախստանի, Ղրղզստանի, Ռուսաստանի, Ուզբեկստանի և Տաջիկստանի համապատասխան մարմինների պաշտոնյաները՝ մի մասը հեռակապի միջոցով։
Բաժանորդագրվեք մեր ալիքին Telegram-ում