Հունաստանում Հայաստանի դեսպանությունը Աթենքում մասնակցել է Ամանորյա միջազգային բարեգործական 24-րդ տոնավաճառին
1 րոպեի ընթերցում
ԵՐԵՎԱՆ, 2 ԴԵԿՏԵՄԲԵՐԻ, ԱՐՄԵՆՊՐԵՍ: Հունաստանում Հայաստանի դեսպանությունը նոյեմբերի 30-ից-դեկտեմբերի 1-ն Աթենքում մասնակցել է Ամանորյա միջազգային բարեգործական 24-րդ տոնավաճառին՝ «Մանկան ընկերներ» (Friends of the Child, Φίλοι του Παιδιού) կազմակերպության հովանու ներքո, որի հասույթները տրամադրվում են սոցիալապես անապահով երեխաների կարիքների համար։
«Արմենպրես»-ի հաղորդմամբ՝ դեսպանության «Ֆեյսբուք»-ի էջը տեղեկացնում է, որ բարեգործական Ամանորյա տոնավաճառին մասնացել են նաև Հունաստանի Հանրապետությունում հավատարմագրված այլ դիվանագիտական ներկայացուցչությունները՝ իրենց ազգային տաղավարներով:
Ըստ աղբյուրի՝ Հայաստանի տաղավարում ներկայացվել են հայկական արտադրության ապրանքատեսակներ՝ խմիչք, քաղցրավենիք, հուշանվերներ, ինչպես նաև հայկական խոհանոցի ուտեստներ։
Տոնավաճառի մշակութային ծրագրի շրջանակներում ելույթով հանդես է եկել Աթենքի «Ավետիս» պարային համույթը, հյուրերին ներկայացնելով հայկական ժողովրդական պարեր։
Տոնավաճառի ողջ հասույթը տրամադրվել է «Մանկան ընկերներ» բարեգործական ասոցիացիային: