Երանոսում արտաքին լուսավորության ցանց է կառուցվում

ԳԱՎԱՌ, 26 ՆՈՅԵՄԲԵՐԻ, ԱՐՄԵՆՊՐԵՍ։ Գեղարքունիքի մարզի Մարտունի համայնքի Երանոս գյուղում ՀՀ կառավարության կողմից 2024 թվականին իրականացվող սուբվենցիոն ծրագրերի շրջանակներում ավարտին են մոտենում արտաքին լուսավորության ցանցի կառուցման աշխատանքները։

Ինչպես «Արմենպրես»-ը տեղեկացավ Մարտունու համայնքապետարանի աշխատակազմից, Երանոսի արտաքին լուսավորության ցանցի կառուցման ծրագրի պայմանագրային արժեքը կազմում է 10 միլիոն 500 հազար դրամ, որի 60 տոկոսը հատկացնում է ՀՀ կառավարությունը, 40 տոկոսը՝ Մարտունու համայնքապետարանը։

Ծրագրով նախատեսված է արտաքին լուսավորության ցանցի կառուցում Երանոսի 3, 7, 8, 9, 11-րդ փողոցներում՝ 2600 մետր ընդհանուր երկարությամբ, ԼԵԴ համակարգով աշխատող 98 լուսատուի տեղադրմամբ։

Օգոստոսից մեկնարկած շինարարական աշխատանքներն արդեն արվել են շուրջ 90 տոկոսով։

Շինաշխատանքներն իրականացնում է «Շին Կոմպլեքս» ՍՊԸ-ն։

Ծրագրի իրականացման արդյունքում մինչ տարեվերջ Երանոս գյուղի վերոնշյալ փողոցներն առաջին անգամ կլուսավորվեն գիշերային ժամերին։