Կառավարությունը կսուբսիդավորի 2024 թվականին կարկուտի հետևանքով տուժած տնտեսավարողների գյուղատնտեսական վարկերը
2 րոպեի ընթերցում
ԵՐԵՎԱՆ, 25 ՆՈՅԵՄԲԵՐԻ։ Հայաստանի կառավարությունը նախատեսում է հաստատել 2024 թվականին Արագածոտնի, Արարատի, Արմավիրի, Գեղարքունիքի, Լոռիի, Շիրակի և Սյունիքի մարզերում տեղացած կարկտի հետևանքով տուժած տնտեսավարողների գյուղատնտեսական վարկերի տոկոսադրույքների սուբսիդավորման ծրագիր։ «Արմենպրես»-ի հաղորդմամբ՝ նախագիծը հրապարակվել է «e-draft» իրավական ակտերի հարթակում։
Այս որոշումը նպատակ ունի մեղմել կարկուտի պատճառած վնասների հետևանքով առաջացած ֆինանսական բեռը և խթանել տուժած տարածքներում գյուղատնտեսական գործունեության շարունակականությունը։
Նախագիծը նպատակ ունի սուբսիդավորել գյուղատնտեսական վարկերի տոկոսադրույքները՝ թեթևացնելով տուժած տնտեսավարողների վարկային պարտավորությունները։ Աջակցությունը տրամադրվելու է այն տնտեսավարողներին, որոնց գյուղատնտեսական մշակաբույսերին կամ բազմամյա տնկարկներին հասցված վնասը կազմել է 50-100%, և որոնց վարկային մնացորդը 5 մլն դրամից ավելի է։
Սուբսիդավորումն իրականացվելու է միայն այն վարկերի տոկոսադրույքների համար, որոնք նպատակային օգտագործվել են գյուղատնտեսության ոլորտում։
Սուբսիդավորվելու են վարկերի տոկոսադրույքները՝ 6 տոկոսային կետով, առավելագույնը 6 ամիս ժամկետով։
Դիմումի գործընթացն իրականացվելու է մինչև 2024 թվականի դեկտեմբերի 31-ը՝ վարկատու ֆինանսական կառույցների միջոցով։
Սուբսիդավորման գործընթացը կսկսվի 2025 թվականի հունվարից, իսկ վերջին հայտը կներկայացվի 2025 թվականի մայիսին։
Ծրագրում չեն ընդգրկվի այն վարկերը, որոնք սուբսիդավորվում են այլ պետական աջակցության ծրագրերով, տնտեսավարողներին, որոնք արդեն աջակցություն են ստացել կարկուտի հետևանքով պատճառված վնասների դիմաց։
Ծրագրի համար անհրաժեշտ ֆինանսավորումը, որը կկազմի շուրջ 50 մլն դրամ, կտրամադրվի 2025 թվականի պետական բյուջեից՝ Էկոնոմիկայի նախարարության միջոցների հաշվին։
Ծրագրի իրականացման շնորհիվ կարկուտի հետևանքով տուժած մարզերում հնարավոր կլինի թեթևացնել գյուղատնտեսական վարկերի բեռը, նպաստել տուժած տնտեսությունների վերականգնմանը, ապահովել գյուղատնտեսական արտադրության շարունակականությունը։