Ռուսաստանը Հյուսիսային Կորեային է մատակարարել 1 միլիոն բարելից ավելի նավթ՝ չնայած պատժամիջոցներին. BBC
2 րոպեի ընթերցում
ԵՐԵՎԱՆ, 22 ՆՈՅԵՄԲԵՐԻ, ԱՐՄԵՆՊՐԵՍ։ Ռուսաստանը 2024 թ. մարտից Հյուսիսային Կորեային ավելի քան մեկ միլիոն բարել նավթ է մատակարարել։ Այս եզրակացությանն է հանգել բրիտանական հետազոտական Open Source Center կենտրոնը՝ արբանյակային պատկերների վերլուծությունից հետո։ «Արմենպրես»-ի փոխանցմամբ՝ կենտրոնն իր հետազոտության արդյունքները կիսել է BBC-ի հետ:
Առաջատար փորձագետները և Մեծ Բրիտանիայի արտգործնախարար Դեյվիդ Լեմին BBC-ին ասել են, որ իրենց համոզմամբ՝ այս նավթով Մոսկվան վճարում է Փհենյանին այն զենքի և զինվորների համար, որոնք Հյուսիսային Կորեան ուղարկել է Ռուսաստան Ուկրաինայի դեմ պայքարի համար։
Արբանյակային պատկերների վերլուծությունը, որոնք Open Source Center-ը բացառապես կիսել է BBC-ի հետ, ցույց է տալիս, որ վերջին ութ ամսվա ընթացքում ավելի քան մեկ տասնյակ հյուսիսկորեական լցանավեր 43 ուղևորություն են կատարել Հեռավոր Արևելքի ռուսական նավթային տերմինալ: Ծովում լցանավերի նկարներից երևում է, որ նրանք դատարկ են գնացել Ռուսաստան և բեռնված վերադարձել։
Առաջին նավարկությունը, որը փաստագրվել է Open Source Center-ի կողմից, տեղի է ունեցել 2024 թվականի մարտի 7-ին՝ Ռուսաստան հյուսիսկորեական զինամթերքի մատակարարման մասին առաջին հաղորդումներից յոթ ամիս անց, իսկ վերջինը՝ նոյեմբերի 5-ին։
«Նավթի այս մշտական հոսքը Հյուսիսային Կորեային տալիս է կայունության այնպիսի մակարդակ, որը նա չի տեսել պատժամիջոցների սահմանումից ի վեր», - ասել է կենտրոնի ավագ վերլուծաբան Ջո Բիրնը:
Հյուսիսային Կորեան իր միջուկային ծրագրի պատճառով գտնվում է ՄԱԿ-ի պատժամիջոցների տակ, և նրան արգելված է տարեկան 500 000 բարելից ավելի նավթ գնել։
1 միլիոն բարելը, որի մասին խոսում է Open Source Center-ը, Ռուսաստանի համար շատ փոքր ծավալ է. ըստ պաշտոնական տվյալների՝ մեկ օրում երկիրն արտադրում է գրեթե տասն անգամ ավելի։