Պուտինը պատրաստ է Թրամփի հետ քննարկել Ուկրաինայում հրադադարի շուրջ համաձայնագիրը. Reuters
2 րոպեի ընթերցում
ԵՐԵՎԱՆ, 20 ՆՈՅԵՄԲԵՐԻ, ԱՐՄԵՆՊՐԵՍ։ ՌԴ նախագահ Վլադիմիր Պուտինը պատրաստ է ԱՄՆ ընտրված նախագահ Դոնալդ Թրամփի հետ Ուկրաինայում հրադադարի շուրջ համաձայնագրի քննարկմանը, սակայն բացառում է որևէ խոշոր տարածքային զիջում և պնդում է, որ Կիևը հրաժարվի ՆԱՏՕ-ին միանալու հավակնություններից։ «Արմենպրես»-ի փոխանցմամբ՝ այս մասին Reuters-ին հայտնել է իրավիճակին ծանոթ հինգ աղբյուր:
Նախկին և ներկա ռուսաստանցի պաշտոնյաները հայտնել են, որ Պուտինը կընդունի Թրամփի միջնորդած համաձայնագիրը և կհամաձայնի սառեցնել հակամարտությունը առաջնագծում։
Reuters-ը նշում է, որ Թրամփը, որը խոստացել է շուտափույթ դադարեցնել հակամարտությունը, Սպիտակ տուն է վերադառնում այն ժամանակ, երբ Ռուսաստանը գերակա դիրքեր է գրավում։ Ըստ հրապարակման՝ Մոսկվան առաջ է շարժվում 2022 թվականին ռազմական գործողությունների մեկնարկից ի վեր ամենաարագ տեմպերով։
Ըստ աղբյուրների՝ մասամբ Ռուսաստանի վերահսկողության տակ գտնվող Դոնեցկի, Լուգանսկի, Զապորոժիեի և Խերսոնի հատվածներում սահմանների հստակ գծման հարցում, հնարավոր է, բանակցությունների տեղ լինի։ Reuters-ի զրուցակիցները նաև հայտնել են, որ Ռուսաստանը, հնարավոր է, պատրաստ լինի դուրս գալ Խարկովում և Նիկոլաևում իր վերահսկողության տակ գտնվող փոքր հատվածներից։
Աղբյուրները նաև նշել են, որ եթե հրադադարի շուրջ համաձայնություն ձեռք չբերվի, ապա Ռուսաստանը կշարունակի կռվել։
Թեև Ռուսաստանը չի հանդուրժի Ուկրաինայի անդամակցությունը ՆԱՏՕ-ին կամ ՆԱՏՕ-ի զորքերի ներկայությունն ուկրաինական հողում, սակայն Մոսկվան պատրաստ է Կիևի անվտանգության երաշխիքների քննարկմանը, ըստ ներկա և նախկին հինգ պաշտոնյաների:
Աղբյուրները նշել են, որ Կրեմլը կարող է առաջ քաշել նաև այնպիսի պահանջներ, ինչպիսիք են Կիևի համաձայնությունը՝ սահմանափակել իր զինված ուժերի չափը և պարտավորվել չսահմանափակել ռուսաց լեզվի օգտագործումը:
Ուկրաինական կողմը դեռ չի արձագանքել Reuters-ի խնդրանքին՝ մեկնաբանել այս հրապարակումը։