Նիկոլ Փաշինյանը ճիշտ քայլ է համարում իր կողմից նոյեմբերի 9-ի եռակողմ փաստաթուղթը ստորագրելը
1 րոպեի ընթերցում
ԵՐԵՎԱՆ, 14 ՆՈՅԵՄԲԵՐԻ, ԱՐՄԵՆՊՐԵՍ: Հայաստանի վարչապետ Նիկոլ Փաշինյանն անդրադարձավ 2020 թվականի նոյեմբերի 9-ի եռակողմ փաստաթղթի ստորագրմանը Հայաստանի վարչապետի, Ռուսաստանի և Ադրբեջանի նախագահների կողմից, որով Լեռնային Ղարաբաղում հրադադար հաստատվեց:
«Արմենպրես»-ի հաղորդմամբ՝ վարչապետն այս մասին խոսեց ԱԺ-ում 2025 թվականի պետական բյուջեի մասին օրենքի նախագծի քննարկմանն իր եզրափակիչ ելույթում:
«2020 թվականի նոյեմբերի 9-ին գործընկերներից շատերն այդ ժամանակ իմ աշխատասենյակում ներկա են եղել, ես ասել եմ՝ այս պահին ինձ ոչ մի կարծիք չի հետաքրքրում, ես ինձ վրա եմ վերցնում պատասխանատվությունը և այս թուղթը ստորագրելու եմ: Եվ համարում եմ, որ ճիշտ եմ արել: Թե ինչու եմ արել, դա ուրիշ խնդիր է»:
Նա շեշտեց՝ պահեր են գալիս, որ պետք է վերցնել պատասխանատվություն:
2020թ նոյեմբերի 9-ի փաստաթուղթը ստորագրվել է Հայաստանի վարչապետի, Ադրբեջանի նախագահի ու Ռուսաստանի նախագահի միջև: Փաստաթղթով կանգնեցվել է Լեռնային Ղարաբաղի դեմ Ադրբեջանի սանձազերծած 44–օրյա պատերազմը: