Շինարարությունը մոտենում է ավարտին. Վրաստանի մշակույթի նախարարն այցելել է Թբիլիսիի պետական հայկական դրամատիկական թատրոն
2 րոպեի ընթերցում
ԵՐԵՎԱՆ, 11 ՆՈՅԵՄԲԵՐԻ, ԱՐՄԵՆՊՐԵՍ։ Նոյեմբերի 2-ին Վրաստանի մշակույթի և սպորտի նորանշանակ նախարար Թինաթին Ռուխաձեն այցելեց Թբիլիսիի Պետրոս Ադամյանի անվան պետական հայկական դրամատիկական թատրոն, շրջայց կատարեց շինարարության ավարտական փուլում գտնվող շենքում։ Այդ մասին տեղեկացնում է «Արմենպրես»-ը՝ վկայակոչելով «Վրաստան» հայկական պարբերականը։
Նախարարը թատրոնի գեղարվեստական ղեկավար Արմեն Բայանդուրյանի հետ միասին դիտեց շենքը, ծանոթացավ թատրոնի կարիքներին և նախարարության անունից համագործակցության պատրաստակամություն հայտնեց։
Հիշեցնենք, որ թբիլիսյան հայկական թատրոնի ավարտական փուլում գտնվող շինարարական և վերակառուցման լայնածավալ աշխատանքներն իրականացվել են Վրաստանի մշակույթի նախարարության նախաձեռնությամբ և «Քարթու» հիմնադրամի ֆինանսական աջակցությամբ։ Շենքի անմխիթար վիճակից ելնելով, որը հաստատվել էր Փորձաքննությունների ազգային բյուրոյի եզրակացությամբ, պահանջվեց շենքի ապամոնտաժում և նոր շենքի կառուցում։
Նշենք, որ Թբիլիսիի Քեթևան թագուհու պողոտայում գտնվող Պետրոս Ադամյանի անվան պետական հայկական դրամատիկական թատրոնը միակ հայկական թատրոնն է, որը պետական թատրոնի կարգավիճակով գործում է Հայաստանի սահմաններից դուրս։ Հիշեցնենք, որ «Վրացական երազանքի» ընտրացուցակով պատգամավորության թեկնածու առաջադրված Թեա Ծուլուկիանիին մշակույթի և սպորտի նախարարի պաշտոնում փոխարինեց Թինաթին Ռուխաձեն, ով մինչ այդ նշանակումը զբաղեցնում էր Թբիլիսիի Սովորող երիտասարդության ազգային պալատի տնօրենի պաշտոնը։
Արտեմ Գրիգորենց