ՀՀ կառավարությունը պատվով է հանձն առել Ֆրանկոֆոնիայի միջազգային 10-րդ խաղերի անցկացումը. Դանիել Դանիելյան
5 րոպեի ընթերցում
ԵՐԵՎԱՆ, 5 ՆՈՅԵՄԲԵՐԻ, ԱՐՄԵՆՊՐԵՍ: Հայաստանում 2027 թվականին անցկացվելիք Ֆրանկոֆոնիայի 10-րդ խաղերին ընդառաջ և «Աջակցություն կլիմայի և շրջակա միջավայրի կառուցվածքային տրանսֆորմացիներին» ծրագրի շրջանակում նոյեմբերի 5-8-ը Երևանում անցկացվում է կարողությունների զարգացման տարածաշրջանային աշխատարան: Այն կազմակերպել է Ֆրանկոֆոնիայի միջազգային կազմակերպությունը (ՖՄԿ)՝ ՀՀ կրթության գիտության, մշակույթի և սպորտի նախարարության, Ֆրանկոֆոնիայի խաղերի միջազգային կոմիտեի և Կայուն զարգացման ֆրանկոֆոնիայի ինստիտուտի միջոցով:
Ինչպես «Արմենպրես»-ը տեղեկանում է ՀՀ ԿԳՄՍ նախարարության տարածած հաղորդագրությունից, աշխատարանի բացման պաշտոնական արարողությանն այսօր մասնակցել են ՀՀ ԿԳՄՍ նախարարի տեղակալ Դանիել Դանիելյանը, Ֆրանկոֆոնիայի խաղերի միջազգային կոմիտեի տնօրեն Զեյնա Մինան, ՖՄԿ-ի տարածաշրջանային ներկայացուցիչ Էրիկ Պոպը, Ֆրանկոֆոն պետությունների՝ ՀՀ-ում հավատարմագրված դեսպաններ, ներկայացուցիչներ ՀՀ շրջակա միջավայրի նախարարությունից, պաշտոնատար այլ անձինք:
Ողջունելով ներկաներին և շնորհավորելով առաջին աշխատարանի բացման կապակցությամբ՝ Դանիել Դանիելյանը նշել է՝ ՀՀ կառավարությունը մեծ պատվով և պատասխանատվությամբ է հանձն առել Հայաստանում Ֆրանկոֆոնիայի միջազգային 10-րդ խաղերի անցկացումը:
ԿԳՄՍ փոխնախարարի տեղեկացմամբ՝ մարզական և մշակութային բաղադրիչներից բացի՝ Ֆրանկոֆոնիայի միջազգային խաղերը ներառում են նաև հարակից թեմաներ, այդ թվում՝ ֆրանսերենի ուսուցման, շրջակա միջավայրի պահպանության և կլիմայի փոփոխությանը հարմարվելու և այլնի վերաբերյալ, որոնք էլ ընդգրկված են եռօրյա աշխատարանի օրակարգում:
«Ծրագիրն առաջին հերթին ուղղված է երիտասարդներին. Ֆրանկոֆոնիայի միջազգային խաղերը նրանց համար նոր մտածելակերպ և միջավայր ստեղծելու հնարավորություն են: Պարբերաբար կլինեն այսպիսի աշխատարաններ՝ տարբեր թեմաներով»,- ասել է նախարարի տեղակալը՝ հույս հայտնելով, որ ավելի մեծ թվով երիտասարդներ կմասնակցեն աշխատարաններին՝ ֆրանկոֆոն միջավայրի ու լեզվի իմացության նպատակով:
Դանիել Դանիելյանը նմանօրինակ աշխատարանների անցկացումը կարևորել է նաև Հայաստանում ֆրանկոֆոն արժեքների տարածումը խրախուսելու համատեքստում:
Ֆրանկոֆոնիայի խաղերի միջազգային կոմիտեի տնօրեն Զեյնա Մինան շնորհակալություն է հայտնել ՀՀ կառավարությանը խաղերի կազմակերպման հարցում գործադրած ջանքերի համար: Զեյնա Մինան շնորհակալություն է հայտնել նաև ֆրանկոֆոն երկրների դեսպաններին: Դիմելով երիտասարդներին՝ Ֆրանկոֆոնիայի խաղերի միջազգային կոմիտեի տնօրենը նշել է՝ նրանց հանձնառությունն ու ստեղծագործական միտքը կարևոր են այն գաղափարների համար, որոնք ծնվել են այստեղ:
«Այն աշխատանքները, որոնք այստեղ կատարվելու են, կնպաստեն խաղերի լավագույնս կազմակերպմանը: Ֆրանկոֆոնիայի միջազգային կազմակերպությունը հավաստում է իր հանձնառությունը՝ նպաստելու այն մարտահրավերների կարգավորմանը, որոնք առկա են Ֆրանկոֆոնիայի 10-րդ խաղերից առաջ»,- նշել է Զեյնա Մինան:
Նա տեղեկացրել է՝ 2027 թվականի հուլիսի 23-ից օգոստոսի 1-ն անցկացվելիք խաղերի ծրագրում ընդգրկվել են 10 մարզաձևեր ու 10 մշակութային միջոցառումներ:
ՖՄԿ-ի տարածաշրջանային ներկայացուցիչ Էրիկ Պոպը ևս ողջունել է ներկաներին ու շնորհակալություն հայտնել Ֆրանկոֆոն խաղերի նախապատրաստական աշխատանքներում ընդգրկված աշխատարանի կազմակերպման համար։
«Պետք է կարողանանք ներգրավել այնպիսի երիտասարդների, որոնք ֆրանկոֆոն են ու մեզ կաջակցեն միջոցառման կազմակերպչական հարցերում»,- ասել է Էրիկ Պոպը:
Աշխատարանին 36 երիտասարդ է մասնակցում, որոնցից 30-ը հայեր են, իսկ 6-ը՝ ֆրանկոֆոն երիտասարդներ Կենտրոնական և Արևելյան Եվրոպայից՝ Ռումինիայից, Բուլղարիայից և Մոլդովայից: Աշխատարանի նպատակն է՝ երիտասարդների շրջանում ձևավորել պատկերացում կանաչ ձեռներեցության, էկո-նորարարության, շրջակա միջավայրի պահպանության և կլիմայի փոփոխության վերաբերյալ։ Կարևորվում է նաև Ֆրանկոֆոնիայի 10-րդ խաղերին ընդառաջ աջակցել մասնակիցներին՝ էկո-քաղաքացիական գործողությունների իրականացման, տարածաշրջանում երիտասարդների և քաղաքացիական հասարակության դերակատարների կարողությունների ամրապնդման կայուն ֆինանսավորման և էկո-քաղաքացիների ներգրավման տեսանկյունից: