Լարսը ժամանակավորապես փակվել է բեռնատարների համար

ԵՐԵՎԱՆ, 5 ՆՈՅԵՄԲԵՐԻ, ԱՐՄԵՆՊՐԵՍ: Վրաստանի տարածքում եղանակային պայմանների վատթարացման պատճառով ժամանակավորապես դադարեցվել է բեռնատարների երթևեկությունը Ռազմավիրական ճանապարհով: Ինչպես «Արմենպրես»-ը տեղեկանում է «Ինտերֆաքս» գործակալությունից, այդ մասին հաղորդել է Հյուսիսային Օսիայի արտակարգ իրավիճակների նախարարության գլխավոր վարչությունը։

«Վրաստանի տարածքում եղանակային պայմանների վատթարացման և անվտանգ երթևեկությունն ապահովելու անհնարինության կապակցությամբ Վլադիկավկազ-Լարս հատվածով Ռուսաստանի Դաշնությունից դուրս գալու ուղղությամբ մեծ բեռնատար ավտոտրանսպորտային միջոցների երթևեկությունն արգելված է Մոսկվայի ժամանակով ժամը 08:20-ից, մինչև հատուկ կարգադրություն կլինի», - ասվում է հաղորդագրության մեջ։

Ռազմավիրական ճանապարհը միակ ցամաքային երթուղին է, որը Ռուսաստանը կապում է Վրաստանի և Հայաստանի հետ։