Չկա մի բան, որ Հայաստանի կողմից արվում է և դիսոնանս ունի Իրանի պատկերացումների հետ․ ԱԳ նախարար
1 րոպեի ընթերցում
ԵՐԵՎԱՆ, 31 ՀՈԿՏԵՄԲԵՐԻ, ԱՐՄԵՆՊՐԵՍ։ Հայաստանի Հանրապետության եվրոպական ուղղությամբ քաղաքականությունը գաղտնիք չէ Իրանի Իսլամական Հանրապետության համար։
«Արմենպրես»-ի հաղորդմամբ՝ Ազգային ժողովի մշտական հանձնաժողովների համատեղ նիստում «Հայաստանի Հանրապետության 2025 թվականի պետական բյուջեի մասին» ՀՀ օրենքի նախագծի քննարկման ժամանակ այս մասին ասաց ՀՀ արտաքին գործերի նախարար Արարատ Միրզոյանը։
«Մեր առաջնահերթությունը հարևանների հետ հարաբերությունների կարգավորումն ու զարգացումն է։ Եվ այստեղ ոչ մեկի համար գաղտնիք չէ, թե մենք ինչ հարաբերություններ ունենք Իրանի Իսլամական Հանրապետության հետ։ Անշուշտ, մեր եվրոպական ուղղությամբ քաղաքականությունը գաղտնիք չէ Իրանի Իսլամական Հանրապետության համար։ Մենք մեր պարբերական շփումներում նաև այս հարցին ենք անդրադառնում։ Կարող եմ ասել, որ չկա մի բան, որը արվում է Հայաստանի Հանրապետության կողմից և չի ողջունվում և դիսոնանս ունի Իրանի Իսլամական Հանրապետության պատկերացումների հետ»,- ասաց Միրզոյանը։