ԱՄՆ-ն Ուկրաինայից պահանջում է իջեցնել մոբիլիզացիայի տարիքը

ԵՐԵՎԱՆ, 15 ՀՈԿՏԵՄԲԵՐԻ, ԱՐՄԵՆՊՐԵՍ։ Ամերիկացի քաղաքական գործիչները ճնշում են գործադրում ուկրաինական իշխանությունների վրա՝ պահանջելով նվազեցնել մոբիլիզացիոն տարիքը։ Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, այդ մասին հայտնել է Ուկրաինայի նախագահ Վոլոդիմիր Զելենսկու գրասենյակի խորհրդական Սերգեյ Լեշչենկոն։

«Կարող եմ հաստատել, որ ամերիկացի քաղաքական գործիչները ճնշում են գործադրում Զելենսկու վրա այն հարցի շուրջ, թե ինչու 18-ից 25 տարեկանների մոբիլիզացիա չի իրականացվում Ուկրաինայում։ Գործընկերների փաստարկը հետևյալն է. Վիետնամի պատերազմի ժամանակ տանում էին 19 տարեկանից։ Ամերիկացիներն ակնարկում են, որ միայն արևմտյան զենքերը բավարար չեն, մոբիլիզացիա է պետք կատարվի 18 տարեկանից։ Զելենսկին շարունակում է համոզել Արևմուտքի քաղաքական գործիչներին զենք տալ՝ առանց զորակոչի տարիքը փոխելու»,- ասել է Լեշչենկոն։

Ուկրաինայի վրա ճնշումների մասին տեղեկությունը հաստատել է նաև Գերագույն ռադայի «Եվրոպական համերաշխություն» կուսակցության պատգամավոր Մարիա Իոնովան։ Նա հայտարարել է, որ անհրաժեշտ է փոխել մոբիլիզացման մոտեցումը, մասնավորապես, մոտիվացիոն միջոցների միջոցով, ինչպիսիք են ֆինանսական աջակցությունը կամ վարկերը։

Ուկրաինայում մոբիլիզացիայի ուժեղացման մասին օրենքը ուժի մեջ է մտել մայիսի 18-ին։ Փաստաթուղթը պարտավորեցնում է բոլոր զինծառայության համար պատասխանատու անձանց ուժի մեջ մտնելու օրվանից 60 օրվա ընթացքում թարմացնել իրենց տվյալները զինկոմիսարիատում։ Դա անելու համար անհրաժեշտ է անձամբ ներկայանալ զինկոմիսարիատ կամ գրանցվել նորակոչիկի էլեկտրոնային հաշվում։