3 րոպեի ընթերցում
ԵՐԵՎԱՆ, 9 ՀՈԿՏԵՄԲԵՐԻ, ԱՐՄԵՆՊՐԵՍ: Մատենադարանում կբացվի ձեռագրերի կենսաքիմիական հետազոտության լաբորատորիա։ Լաբորատորիան կբացվի «Հիշողության կերպարանքները» 13-րդ միջազգային ամենամյա գիտագործնական եռօրյա սեմինարի շրջանակներում։ Լաբորատորիան կբացվի «ԱրարատԲանկ»-ի աջակցությամբ։
Մատենադարանում մեկնարկած «Հիշողության կերպարանքները» խորագրով սեմինարի ժամանակ ունեցած ելույթում «ԱրարատԲանկ» ԲԲԸ խորհրդի նախագահ Գրիգոր Հովհաննիսյանն ընդգծեց, որ Մատենադարանը մարմնավորում է հայ ժողովրդի առաքելությունը՝ ստեղծել գիտելիք, իմաստնություն, պահպանել, գրի առնել, հանձել հաջորդ սերնդին և հոգ տանել, որպեսզի այդ ժառանգությունը պահպանվի:
«Այս ժառանգությունը հավաքվել է շատ դաժան պայմաններում վանականների, գաղթականների, բարերարների միջոցով, և հիմա արդեն մեր ազգի լավագույն ներկայացուցիչներն այստեղ խնդիրը լուծում են տեխնիկապես: Խոսքը վերաբերում է ոչ միայն հայկական մշակութային ժառանգությանը: Անձնական օրինակով կարող եմ ասել, որ տարիներ առաջ մեր ժողովրդի պատմության մի հատվածն ուսումնասիրել եմ միայն Մատենադարանում պահպանվող արաբական մատենագրերի միջոցով: Մատենադարանն այսօր մշակութային ժառանգության պահպանության հարց է լուծում նաև Հայաստանի սահմաններից դուրս, օրինակ՝ Իրաքյան Քուրդիստանում մոռացության մատնված ասորական մատենագրերը վերականգնելու առումով: Շնորհակալություն եմ հայտնում՝ որպես նախկին միջազգայնագետ»,- «Արմենպրես»-ի փոխանցմամբ՝ ասաց Հովհաննիսյանը:
«ԱրարատԲանկ»-ի խորհրդի նախագահը մեծապես գնահատեց այն անձանց ազգանվեր աշխատանքը, ովքեր իրենց վստահելի ձեռքում են պահում մեր հավաքական հիշողությունը:
Հովհաննիսյանի հավաստմամբ՝ «ԱրարատԲանկ»-ը երախտապարտ է Մատենադարանին և երջանիկ է ասոցացվելու մշակութային ժառանգության պահպանության ազնվագույն գործին:
«Ուզում եմ հաստատել համագործակցությունը շարունակելու մեր հանձնառությունը և հույս ունեմ, որ ապագայում ևս կլինենք Մատենադարանի բարեկամների շարքում»,- եզրափակեց «ԱրարատԲանկ»-ի խորհրդի նախագահը:
Մատենադարանի տնօրեն Արա Խզմալյանը հույս հայտնեց, որ իր ղեկավարած կառույցը ապագայում շատ լայն ու բազմաշերտ համագործակցություն է ծավալելու «ԱրարատԲանկ»-ի հետ։
Մանվել Մարգարյան