1 րոպեի ընթերցում
ԵՐԵՎԱՆ, 4 ՀՈԿՏԵՄԲԵՐԻ, ԱՐՄԵՆՊՐԵՍ: ՆԳՆ ոստիկանության Մեղրու բաժնում ստացված օպերատիվ տեղեկությունն իրացվել է Պարեկային ծառայության Սյունիքի մարզի գումարտակի ծառայողների հետ։ Ինչպես «Արմենպրես»-ին տեղեկացրին ՀՀ ներքին գործերի նախարարությունից, հոկտեմբերի 4-ին, ժամը 9.20-ի սահմաններում իրավապահները Հայաստան-Իրան սահմանի մոտակայքում նկատել են կայանված «Նիսան» մակնիշի մեքենա, որի վարորդն ու ուղևորը տեսնելով ոստիկաններին՝ գետնին են գցել 3 փաթեթ։
Ըստ աղբյուրի՝ առանձնապես խոշոր չափերի թմրանյութերի մաքսանենգություն կատարելու կասկածանքով 38 և 39 տարեկան տղամարդիկ ձերբակալվել և տեղափոխվել են ՆԳՆ ոստիկանության Մեղրու բաժին, իսկ մեքենան վերցվել է հատուկ հսկողության։
Նշվում է, որ դեպքի վայրի զննությամբ հայտնաբերվել են շուրջ 9 կգ 330 գ մարիխուանայի, շուրջ 1 կգ 150 գ մեթամֆետամինի, շուրջ 510 գրամ ափիոնի և շուրջ 530 գրամ հերոինի նմանվող զանգվածներ։
Ձերբակալվածները ներկայացվել են Սյունիքի մարզային քննչական վարչություն։
ՀՀ ՆԳՆ տեղեկացմամբ՝ նախաձեռնվել է քրեական վարույթ։ Հանգամանքները պարզվում են։