18 ՍԵՊՏԵՄԲԵՐԻ, ԱՐՄԵՆՊՐԵՍ: Համաշխարհային հայկական երկրորդ գագաթնաժողովը սփյուռքի և Հայաստանի միջև երկխոսության մեծ հարթակ է. սա հնարավորություն է իրավիճակը հասկանալու և Հայաստանին թիրախային օգնություն ցուցաբերելու տեսակետից:
«Արմենպրես»-ի թղթակցի հաղորդմամբ՝ Համաշխարհային հայկական երկրորդ գագաթնաժողովում այս մասին նշեց VIVA հիմնադրամի ղեկավար, գլխավոր գործադիր տնօրեն և համահիմնադիր Տատյանա Հովհաննիսյանը՝ շեշտելով, որ իր համար այս համաժողովը շատ կարևոր է, քանի որ ինքն արդեն երեք տարի է Ռուսաստանից տեղափոխվել ու հաստատվել է Հայաստանում:
«Նման հարթակները սփյուռքի և Հայաստանի միջև երկխոսության հնարավորություն են: Մենք հայրենիքից դուրս հաճախ չենք հասկանում, թե ինչն է ավելի անհրաժեշտ Հայաստանին, իսկ սա հնարավորություն է հասկանալու և Հայաստանին թիրախային օգնություն ցուցաբերելու տեսակետից:
Լինելով բժիշկ, գիտնական՝ ես շատ կուզեի տարիներ առաջ ունենալ նմանատիպ հարթակներ, որտեղ կկարողանաի խոսել, հարցեր տալ ու հասկանալ, թե ինչո՞վ ես կարող եմ օգնել Հայաստանին, որ ծրագրերի մեջ է անհրաժեշտ իմ փորձը, կարողությունները և պրակտիկան օգտագործել»,- նշեց Հովհաննիսյանը:
Նա ընդգծեց, որ կամավոր բժիշկներից կազմված VIVA հիմնադրամն արդեն 8 տարի է՝ գործունեություն է ծավալում Հայաստանում:
«Օգնում ենք Հայաստանին առողջապահական համակարգում: Իրականացում ենք բժիշկների համար դասընթացներ և վերապատրաստումներ, և շատ ենք ուզում, որ բժշկական ոլորտը զարգանա նաև Հայաստանի մարզերում: Այժմ աշխատում ենք այդ ուղղությամբ»,- նկատեց նա:
Տատյանա Հովհաննիսյանն ընդգծեց՝ այսօր իրենց հիմնադրամը փորձում է մարդկանց պատրաստել ցանկացած ծանր իրավիճակների՝ երկրաշարժ, պատերազմ այլ աղետներ:
«Օրինակ, մենք այժմ դպրոցներում սովորեցնում ենք առաջին օգնություն ցուցաբերել, որպեսզի տարիներ հետո այդ երեխաները, զորակոչվելով բանակ, պատրաստ լինեն օգնելու և՛ իրենք իրենց և՛ զինակից ընկերներին»,- եզրափակեց նա: