ԵՐԵՎԱՆ, 16 ՍԵՊՏԵՄԲԵՐԻ, ԱՐՄԵՆՊՐԵՍ։ Կիրանցի բնակիչները վստահ են, որ իրենք ավելի պաշտպանված են, քան մինչև սահմանազատում իրականացնելը։ «Արմենպրես»-ի հաղորդմամբ՝ խորհրդարանական ճեպազրույցի ժամանակ այս մասին ասաց Ազգային ժողովի պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը։
«Չնայած կասկածները շատ մեծ էին, որ Կիրանցի դպրոցը չի գործելու, սակայն այն այսօր գործում է, երեխաները գնում են դասի։ Նրանք գնացել են դասի, որովհետև Կիրանցի մեր հայրենակիցները վստահ են, որ իրենք ավելի պաշտպանված են, քան մինչև սահմանազատում իրականացնելը։ Արձանագրենք այդ փաստը ևս։ Անվտանգության տեսանկյունից խնդիրը լուծում են զինված ուժերը և սահմանապահ զորքերը»,- նշեց Քոչարյանը։