ԵՐԵՎԱՆ, 16 ՍԵՊՏԵՄԲԵՐԻ, ԱՐՄԵՆՊՐԵՍ: Վերջին շրջանում աշխարհում տարածված հիվանդությունների շարքին է դասվում Արևմտյան Նեղոսի տենդը, որից զերծ չի մնացել նաև Հայաստանը: Հիվանդության տարածման պատճառներից են գլոբալ տաքացումը, վարակված թռչունների միգրացիան: Մասնագետները նշում են, որ հիվանդությունը մարդուց մարդուն չի փոխանցվում, մոծակն է վիրուսը վերցնում ու փոխանցում մարդուն:
«Արմենպրես»-ը «Հարց բժշկին» նախագծի հերթական թողարկման շրջանակում Հիվանդությունների վերահսկման և կանխարգելման ազգային կենտրոնի Մարդու ու կենդանիների համար ընդհանուր և մակաբուծային հիվանդությունների համաճարակաբանության բաժնի պետ Գայանե Գրիգորյանի հետ զրուցել է Արևմտյան Նեղոսի տենդի տարածվածության, ախտանշանների, փոխանցման և պաշտպանվելու եղանակների մասին:
Գայանե Գրիգորյանի խոսքով՝ Արևմտյան Նեղոսի տենդը սուր վիրուսային հիվանդություն է: Այն նոր հիվանդություն չէ, պարզապես Հայաստանում առաջին անգամ տենդի կլինիկորեն և լաբարատոր դեպքեր հաստատվեցին օգոստոսի 7-ից սկսած: Ըստ մասնագետի՝ դեպքերի մեծամասնությունը գրանցվել է Արմավիրի մարզում, հաջորդիվ Արարատի և Արագածոտնի մարզերն են, հատուկենտ դեպքեր կան Կոտայքում ու Շիրակում, դեպքեր են արձանագրվել նաև մայրաքաղաք Երևանում։
«Արևմտյան Նեղոսի տենդով վարակվածների 80 տոկոսի դեպքերում հիվանդությունն ընթանում է առանց ախտանշանների: Վարակվածների մեծ մասը կարող է նույնիսկ չզգալ, որ վարակվել է, և հիվանդությունն այդպես էլ անցնի: Սակայն մնացած 20 տոկոսի դեպքում կարող են լինել ախտանիշներ: Թեթև դեպքերի ախտանշաններն են ջերմությունը, գլխացավը, մկանացավը, հոգնածությունը: Ծանր դեպքերում հիվանդը կարող է ունենալ նյարդային համակարգի ախտահարում, ուժեղ գլխացավ, բարձր ջերմություն, պարանոցի ցավ, գիտակցության կորուստ»,- նշեց մասնագետը:
Ի՞նչպիսի հիվանդություն է Արևմտյան Նեղոսի տենդն, ինչպե՞ս պաշտպանվել այս վարակից, ինչպե՞ս է բուժվում այն, ո՞ր դեպքում կարող է ծանր ընթացք ունենալ, Հայաստանում այժմ վարակի տարածումը կանխելու նպատակով ի՞նչ քայլեր է իրականացվում. վերոնշյալ և մի շարք այլ հարցերին ու մասնագետի կողմից առաջարկվող լուծումներին առաջարկում ենք ծանոթանալ՝ լսելով փոդքաստը:
Գայանե Գաբոյան
Լսեք նաև այլ թեմաներով Podcast-ները