Պատգամավորները կառավարությանն առաջարկել են վերանայել դեղերի նկատմամբ ԱԱՀ կիրառումը

1 րոպեի ընթերցում

ԵՐԵՎԱՆ, 9 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի ազգային ժողովի պատգամավորները կառավարությանն առաջարկել են վերանայել դեղերի նկատմամբ ավելացված արժեքի հարկի կիրառումը:

«Արմենպրես»-ի փոխանցմամբ՝ ԱԺ նիստում այս մասին ասաց «Քաղաքացիական պայմանագիր» խմբակցության պատգամավոր Լուսինե Բադալյանը՝ անդրադառնալով ընդդիմադիր «Հայաստան» խմբակցության պատգամավոր Գառնիկ Դանիելյանի բարձրաձայնած մտահոգությանը, որ դեղերի գները Վրաստանում ավելի ցածր են, քան Հայաստանում:

Դանիելյանը նշեց՝ եթե անհրաժեշտ է, Հայաստանն էլ պետք է ազատվի դեղերի ԱԱՀ–ից:

«Այդ հարց լրջորեն քննարկվում է: Մենք կառավարությանն առաջարկել ենք վերանայել: Եվ, եթե կարիք լինի, հանդես կգանք օրենսդրական նախաձեռնությամբ»,–ասաց Լուսինե Բադալյանը՝ հավելելով, որ կառավարությունն այս պահին քննարկում ԱԱՀ–ն վերանայելու հարցը:

Ըստ պատգամավորի՝ շատ մանրուքներ կան, որոնց ուշադրություն դարձնելով, վերահսկողություն սահմանելով, օրենքները փոխելով, կարող են որոշակիորեն վերահսկել դեղերի գները:

Բաժանորդագրվեք մեր ալիքին Telegram-ում