Մյունխենում Իսրայելի հյուպատոսարանի մոտ փոխհրաձգություն է տեղի ունեցել, հրաձիգը սպանվել է
2 րոպեի ընթերցում
![Մյունխենում Իսրայելի հյուպատոսարանի մոտ փոխհրաձգություն է տեղի ունեցել, հրաձիգը սպանվել է](http://armenpress.am/resized/480/storage/images/articles/2024/09/05/LDUl08jnNfjFCT4k3EpR4KhyouPVTDDRyfDWwcji.webp)
ԵՐԵՎԱՆ, 5 ՍԵՊՏԵՄԲԵՐԻ, ԱՐՄԵՆՊՐԵՍ։ Գերմանիայի Մյունխեն քաղաքում Իսրայելի հյուպատոսարանի և Նացիզմի պատմության թանգարանի մերձակայքում փոխհրաձգություն է տեղի ունեցել, որի հետևանքով ոստիկանների կրակոցներից 1 մարդ է զոհվել։ «Արմենպրես»-ի փոխանցմամբ՝ այս մասին հաղորդում է Reuters գործակալությունը։
Ըստ ոստիկանության՝ կասկածյալը տղամարդ էր, որի մոտ կար երկարափող հրացան։
«Ոստիկանության միջամտության շնորհիվ չարագործը կանգնեցվել է, և նա, ամենայն հավանականությամբ, զոհվել է դեպքի վայրում», - ասել է Բավարիայի ներքին գործերի նախարար Ջոակիմ Հերմանը։
Մյունխենի ոստիկանությունը հայտնել է, որ ոչինչ չի վկայում այլ կասկածյալների մասին։
Միջադեպը տեղի է ունեցել 1972 թվականին Մյունխենում Օլիմպիական խաղերի ժամանակ իրականացված հարձակման տարելիցին, երբ պաղեստինյան «Սև սեպտեմբեր» խմբավորման զինյալները սպանեցին 11 իսրայելցի մարզիկի։
Իսրայելի արտգործնախարարությունը հայտարարել էր, որ հյուպատոսարանը սեպտեմբերի 5-ին փակ է լինելու՝ Օլիմպիական խաղերի ժամանակ տեղի ունեցած սպանության տարելիցի կապակցությամբ։ Հյուպատոսարանի ոչ մի աշխատակից չի տուժել։
Ոստիկանությունն ավելի վաղ հայտնել էր լայնածավալ գործողության մասին՝ ի պատասխան միջադեպի, և հանրությանը խնդրել էր հեռու մնալ նշված տարածքից։ Գործողությանը ներգրավվել էր նաև ուղղաթիռ։