Բրիտանիան, ԱՄՆ-ն և ԵՄ-ն որոշել են համաձայնագիր ստորագրել ԱԲ-ի ստանդարտների վերաբերյալ. FT
3 րոպեի ընթերցում
![Բրիտանիան, ԱՄՆ-ն և ԵՄ-ն որոշել են համաձայնագիր ստորագրել ԱԲ-ի ստանդարտների վերաբերյալ. FT](http://armenpress.am/resized/480/storage/images/articles/2024/09/05/FUqHlVIAOBYkw87XKPXiBCnXxwdU6qmRo7ETDGep.webp)
ԵՐԵՎԱՆ, 5 ՍԵՊՏԵՄԲԵՐԻ, ԱՐՄԵՆՊՐԵՍ: Մեծ Բրիտանիան, ԱՄՆ-ն և ԵՄ-ն մտադիր են առաջին միջազգային համաձայնագիրը ստորագրել արհեստական բանականության (ԱԲ) կիրառման վերաբերյալ, որը պարտադիր իրավաբանական ուժ կունենա։ «Արմենպրես»-ի փոխանցմամբ՝ այս մասին հաղորդել է Financial Times-ը (FT)։
Պարբերականի տվյալներով՝ խոսքը Եվրոպայի խորհրդի փաստաթղթի մասին է, որը «երկու տարվա ընթացքում մշակվել է ավելի քան 50 երկրի, այդ թվում՝ Կանադայի, Իսրայելի, Ճապոնիայի և Ավստրալիայի ներկայացուցիչների կողմից»։
Համաձայնագիրն ստորագրած բոլոր կողմերը «պատասխանատվություն են կրելու ԱԲ-ի համակարգերում ցանկացած վնասաբեր կամ խտրական բովանդակության նյութերի համար»: Դրան համապատասխան՝ արգելվում է այնպիսի նյութերի տեղադրումը, որոնք խախտում են հավասարությունը և մասնավոր կյանքի անձեռնմխելիության իրավունքը»։
Ինչպես նշել է Մեծ Բրիտանիայի գիտության, նորարարությունների և տեխնոլոգիաների նախարար Փիթեր Քայլը, «նորարարությունները զարգանում են նույնքան արագ, որքան արհեստական բանականությունը, և շատ կարևոր է, որ մենք նմանատիպ առաջին քայլը կատարենք ամբողջ աշխարհում»:
«Սա առաջին (համաձայնագիրն) է աշխարհում, որն իրական միջոցներ է նախատեսում (այս ոլորտում) և միավորում շատ տարբեր երկրներ», - ասել է Քայլը:
Ըստ հրապարակման՝ պայմանագրի նախագիծը պատրաստվել է կառավարությունների կողմից բազմաթիվ նոր կանոնների, պարտավորությունների և համաձայնագրերի մշակման ֆոնին` «արհեստական բանականության արագ զարգացող ծրագրային ապահովումը վերահսկելու համար»: Դրանք ներառում են Արհեստական բանականության մասին եվրոպական օրենքը (2024 թ.) և Մեծ յոթնյակի համաձայնագիրը, որը համաձայնեցվել է 2023 թ. հոկտեմբերին:
Եվրոպական արժեքների և տեղեկատվական թափանցիկության հարցերով Եվրահանձնաժողովի փոխնախագահ Վերա Յուրովան հայտարարել է, որ «միջազգային բազմաթիվ գործընկերներ պատրաստ են ստորագրել համաձայնագիրը»։ ԵՀ փոխնախագահը հավելել է, որ նոր փաստաթուղթը «կարևոր քայլեր է նախատեսում արհեստական բանականության հավելվածների նախագծման, մշակման և օգտագործման համար»։