Նաուսեդան ասել է, որ ՆԱՏՕ-ն չի հրաժարվել Ուկրաինայի օդային տարածքում հրթիռներ խոցելու գաղափարից
1 րոպեի ընթերցում
ԵՐԵՎԱՆ, 4 ՍԵՊՏԵՄԲԵՐԻ, ԱՐՄԵՆՊՐԵՍ։ ՆԱՏՕ-ն շարունակում է քննարկել Ուկրաինայի օդային տարածքում ռուսական հրթիռները խոցելու հնարավորությունը։ Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, այդ մասին Վարշավայում լրագրողներին հայտնել է Լիտվայի նախագահ Գիտանաս Նաուսեդան։
Ավելի վաղ Լեհաստանի արտգործնախարար Ռադոսլավ Սիկորսկին հայտարարել էր, որ Ուկրաինային սահմանակից երկրները, չնայած ՆԱՏՕ-ի առարկություններին, պարտավոր են խոցել մոտեցող ռուսական հրթիռները՝ նախքան դրանք կմտնեն իրենց օդային տարածք։
«ՆԱՏՕ-ի երկրները սկսել են քննարկել այս թեման։ Այսօր մենք չենք կարող ասել, որ քննարկումն ավարտված է, և մենք ունենք որևէ կոնկրետ արդյունք, բայց մեր երկրները, այլ պետությունների հետ, նախաձեռնում են նման քննարկումներ և ցանկանում են, որ այս որոշումը կայացվի առաջին հերթին ՆԱՏՕ-ի մակարդակով», - ասել է Նաուսեդան: