Աշխարհի երկրները ֆինանսավորել են ՄԱԿ-ի տարեկան բյուջեի միայն 40 տոկոսը
1 րոպեի ընթերցում
![Աշխարհի երկրները ֆինանսավորել են ՄԱԿ-ի տարեկան բյուջեի միայն 40 տոկոսը](http://armenpress.am/resized/480/storage/images/articles/2024/09/04/QSMKuSUS3wDFFg7nOS5aG42O2F6ThY32FLgzkyAq.webp)
ԵՐԵՎԱՆ, 4 ՍԵՊՏԵՄԲԵՐԻ, ԱՐՄԵՆՊՐԵՍ։ 2024 թվականի հուլիսի դրությամբ՝ աշխարհի պետությունները ֆինանսավորել են ՄԱԿ-ի տարեկան բյուջեի միայն 40%-ը, ինչը ազդում է կազմակերպության գործունեության վրա։ Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, այդ մասին ասել է ՄԱԿ-ի Մարդու իրավունքների խորհրդի նախագահ և Ժնևում կազմակերպության Մարոկկոյի մշտական ներկայացուցիչ Օմար Զնիբերը։
«Հուլիսի դրությամբ ՄԱԿ-ը չի ստացել 2024 թվականի բյուջեի 60 տոկոսը: Դա, անշուշտ, բացասաբար է ազդում կազմակերպության գործունեության վրա», - ասել է նա:
Ժնևում ՄԱԿ-ի կենտրոնակայանը մարտ ամսին փոխեց աշխատանքային ժամերը և փակեց որոշ շենքեր՝ ֆինանսավորման պակասի պատճառով։ Այդ քայլ արվեց 2024 թվականին 15 միլիոն դոլար խնայելու համար:
ՄԱԿ-ի կանոնավոր բյուջեն հաստատվում է մեկ ֆինանսական տարվա համար, որը տևում է հունվարի 1-ից դեկտեմբերի 31-ը։ ՄԱԿ-ի 2024 թվականի բյուջեն ընդունվել է 3,27 միլիարդ ԱՄՆ դոլարի չափով։