Սևան քաղաքի Էներգետիկների փողոցում մեկնարկել են հիմնանորոգման աշխատանքները
1 րոպեի ընթերցում
![Սևան քաղաքի Էներգետիկների փողոցում մեկնարկել են հիմնանորոգման աշխատանքները](http://armenpress.am/resized/480/storage/images/articles/2024/09/04/Zk7DFJiaH1fuph4XJr7ZtDegu4sDxI40PcQ6Y6ZZ.webp)
ԳԱՎԱՌ, 4 ՍԵՊՏԵՄԲԵՐԻ, ԱՐՄԵՆՊՐԵՍ։ Գեղարքունիքի մարզի Սևան քաղաքի Էներգետիկների փողոցում ՀՀ կառավարության կողմից 2024 թվականին իրականացվող սուբվենցիոն ծրագրերի շրջանակներում մեկնարկել են ճանապարհային պատվածքի և մայթերի հիմնանորոգման աշխատանքները։
Ինչպես «Արմենպրես»-ը տեղեկացավ Սևանի համայնքապետարանի աշխատակազմից, Էներգետիկների փողոցի հիմնանորոգման ծրագրի պայմանագրային արժեքը կազմում է 48 միլիոն 105 հազար 300 դրամ, որի 50 տոկոսը հատկացնում է ՀՀ կառավարությունը, 50 տոկոսը՝ Սևանի համայնքապետարանը։ Ծրագրով նախատեսված է ճանապարհային պատվածքի, ուղիների և մուտքերի, մայթերի հիմնանորոգում, դիտահորերի պատերի ամրացում, կափարիչների, եզրաքարերի, եզրաշարերի, նոր մետաղական խողովակների տեղադրում, ջրամեկուսացում, ջրհավաք հորերի իրականացում և այլ շինարարական աշխատանքներ: Հիմնանորոգումն ընդգրկում է 2862 քառակուսի մետր տարածք:
Շինարարական աշխատանքների իրականացման կապալառու կազմակերպությունը «ՃԱՆ-ՇԻՆ» ՍՊԸ-ն է։
Շինարարությունը նախատեսված է ավարտի հասցնել այս տարվա ընթացքում։
Խոսրով Խլղաթյան