Հյուսիսային Կորեան կրկին աղբով բեռնված փուչիկներ է ուղարկել Հարավային Կորեայի կողմը

ԵՐԵՎԱՆ, 4 ՍԵՊՏԵՄԲԵՐԻ, ԱՐՄԵՆՊՐԵՍ: Հյուսիսային Կորեան հերթական անգամ Հարավային Կորեայի տարածք է ուղարկել փուչիկներ, որոնք, ամենայն հավանականությամբ, բեռնված են եղել աղբով։ «Արմենպրես»-ի փոխանցմամբ՝ այս մասին հաղորդում է Yonhap գործակալությունը՝ հղում անելով Հարավային Կորեայի Զինված ուժերի շտաբների պետերի միացյալ կոմիտեին:

Կոմիտեից տեղեկացրել են, որ փուչիկները թռչում էին դեպի երկրի հյուսիսային Գյոնգի-դո նահանգ, որտեղ գտնվում է Սեուլը։ Բնակչությանը կոչ է արվել չդիպչել փուչիկներին, ինչպես նաև դրանց մասին հայտնել զինվորականներին կամ ոստիկանությանը:

Գործակալությունը նշում է, որ ԿԺԴՀ-ն շուրջ մեկ ամիս աղբով բեռնված փուչիկներ չի արձակել Հարավային Կորեայի կողմը։

Մինչ այդ, մայիսի վերջից Հյուսիսային Կորեան աղբով բեռնված հազարավոր փուչիկներ էր ուղարկել Հարավային Կորեա՝ որպես պատասխան այն քարոզչական թռուցիկների, որոնք Հարավային Կորեայում հյուսիսկորեացի փախստականները ԿԺԴՀ են ուղարկել նաև փուչիկների միջոցով, նշում է գործակալությունը։

Ի պատասխան փուչիկների արձակման՝ Սեուլը վերսկսել է բարձրախոսներից քարոզչական բնույթի նյութերի հեռարձակումը դեպի ԿԺԴՀ-ի կողմը։