Մեծ Բրիտանիայի ՊՆ ղեկավարը հաստատել է նոր միջուկային սուզանավերի կառուցման պլանները
2 րոպեի ընթերցում
![Մեծ Բրիտանիայի ՊՆ ղեկավարը հաստատել է նոր միջուկային սուզանավերի կառուցման պլանները](http://armenpress.am/resized/480/storage/images/articles/2024/09/04/d7kmNnJUv6feTXf2yo4JkxqG3R0oseAvCDAXL5NB.webp)
ԵՐԵՎԱՆ, 4 ՍԵՊՏԵՄԲԵՐԻ, ԱՐՄԵՆՊՐԵՍ: Մեծ Բրիտանիայի լեյբորիստական կառավարությունը հավատարիմ է հաջորդ տասնամյակում իր ռազմավարական միջուկային սուզանավերի արդիականացման պլաններին: «Արմենպրես»-ի փոխանցմամբ՝ այս մասին հայտարարել է Միացյալ Թագավորության պաշտպանության նախարար Ջոն Հիլին Շոտլանդիա այցի ժամանակ։
«Մեր նոր կառավարությունն անդրդվելի է միջուկային զսպման իր հանձնառության հարցում», - նրա խոսքերը մեջբերված են Բրիտանիայի կառավարության տարածած մամուլի հաղորդագրության մեջ։
Հիլին հավելել է, որ Լեյբորիստական կուսակցությունը, որն իշխանության է եկել հուլիսի 4-ին կայացած խորհրդարանական ընտրությունների արդյունքներով, մտադիր չէ դադարեցնել Vanguard տիպի միջուկային սուզանավերը Dreadnought տիպի նոր սուզանավերով փոխարինելու ծրագիրը։
Մեծ Բրիտանիան ունի Vanguard տիպի չորս միջուկային սուզանավ, որոնք կառուցվել են 1990-ական թվականներին՝ HMS Vanguard-ը, HMS Vengeance-ը, HMS Victorious-ը և HMS Vigilant-ը: Ըստ հաղորդագրության՝ այս սուզանավերը 2030-ականների սկզբին կփոխարինվեն Dreadnought տիպի սուզանավերով։
Սեպտեմբերի 2-ին Հիլին հայտարարել էր, որ Մեծ Բրիտանիան ստիպված կլինի հրաժարվել մի քանի ռազմական ծրագրերից՝ կապված երկրում տիրող դժվարին ֆինանսական իրադրության հետ։ The Times թերթի աղբյուրների համաձայն՝ Լոնդոնը կարող է դադարեցնել Tempest ծրագիրը՝ մշակելու նոր սերնդի կործանիչ: