ԳԱՎԱՌ, 12 ՕԳՈՍՏՈՍԻ, ԱՐՄԵՆՊՐԵՍ։ Արդեն մի քանի օր է, ինչ Գեղարքունիքի մարզի Գավառ համայնքում ՀՀ կառավարության կողմից 2024 թվականին իրականացվող սուբվենցիոն ծրագրերի շրջանակներում մեկնարկել են Գեղարքունիք և Լանջաղբյուր գյուղերի խմելու ջրագծի հիմնանորոգման աշխատանքները։
Ինչպես «Արմենպրես»-ը տեղեկացավ Գավառի համայնքապետարանի աշխատակազմից, Գեղարքունիք և Լանջաղբյուր գյուղերի խմելու ջրատարի հիմնանորոգման ծրագրի պայմանագրային արժեքը կազմում է 71 միլիոն 736 հազար դրամ, որի 75 տոկոսը հատկացնում է ՀՀ կառավարությունը, 25 տոկոսը՝ Գավառի համայնքապետարանը ։
Ծրագրով նախատեսվում է նշյալ գյուղերից 17 կիլոմետր հեռավորությամբ գտնվող Սպիտակասարի ջրաղբյուրի մոտ ջրընդունիչ աղբյուրակապի կառուցում և ցանկապատում, նոր ջրատարի անցկացում պոլիէթիլենային խողովակներով՝ 13 կիլոմետր երկարությամբ։ Ծրագրի իրականացման արդյունքում կբարելավվի Գեղարքունիք և Լանջաղբյուր գյուղերի շուրջ 700 տնտեսությունների խմելու ջրի մատակարարումը։
Այժմ ընթանում են ջրընդունիչ աղբյուրակապի կառուցման և Սպիտակասարից դեպի բնակավայրեր խրամուղիների փորման աշխատանքները։
Շինարարական աշխատանքները նախատեսվում է ավարտի հասցնել այս տարվա ընթացքում։
Խոսրով Խլղաթյան