Փրկարարները Սևանի ափից մոտ 3 կմ հեռավորության վրա հայտնաբերել են հեծանվանավակով քաղաքացուն և մոտեցրել ափ
1 րոպեի ընթերցում
![Փրկարարները Սևանի ափից մոտ 3 կմ հեռավորության վրա հայտնաբերել են հեծանվանավակով քաղաքացուն և մոտեցրել ափ](http://armenpress.am/resized/480/storage/images/articles/2024/08/06/JrzpjUEvVKMCg2MEvkBzO6TKRE4uRe1nxGMlpjxU.webp)
ԵՐԵՎԱՆ, 6 ՕԳՈՍՏՈՍԻ, ԱՐՄԵՆՊՐԵՍ: Գեղարքունիքի մարզային փրկարարական վարչության ճգնաժամային կառավարման կենտրոնն oգոստոսի 6-ին, ժամը 17:54-ին ահազանգ է ստացել, որ Սևանա լճի հանգստյան գոտիներից մեկի տարածքից քաղաքացին հեծանվանավակով հեռացել է ափից և չի կարողանում վերադառնալ․անհրաժեշտ է փրկարարների օգնությունը։
Ինչպես «Արմենպրես»-ին տեղեկացրին ՀՀ ներքին գործերի նախարարության փրկարար ծառայությունից, դեպքի վայր են մեկնել Շողակաթ գյուղի հանրային լողափում հերթապահություն իրականացնող ՆԳՆ ՓԾ փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի փրկարարական խումբը և մարզային փրկարարական վարչության հատուկ ջրափրկարարական ջոկատի մեկ մարտական հաշվարկ:
Ըստ աղբյուրի՝ փրկարարներն ափից մոտ 3 կմ հեռավորության վրա հայտնաբերել են հեծանվանավակն ու քաղաքացի Գ․ Ս․-ին (ծնված 1980 թ․) և մոտեցրել ափ: