ԱՄՆ-ն Ուկրաինայի պաշտպանական կարողություններին ուղղված զգալի օգնություն կտրամադրի
1 րոպեի ընթերցում
![ԱՄՆ-ն Ուկրաինայի պաշտպանական կարողություններին ուղղված զգալի օգնություն կտրամադրի](http://armenpress.am/resized/480/storage/images/articles/2024/07/29/A3k6yLZXllvhr8EX47KiuOdQx4mIudd20UtiBt9J.webp)
ԵՐԵՎԱՆ, 29 ՀՈՒԼԻՍԻ, ԱՐՄԵՆՊՐԵՍ: Ամերիկայի Միացյալ Նահանգները Ուկրաինային օգնության նոր փաթեթ կհատկացնի։ «Արմենպրես»-ի հաղորդմամբ՝ ինչպես փոխանցում է «ՌԻԱ Նովոստի»-ն, այս մասին հուլիսի 29-ին կայացած ճեպազրույցում հայտարարել է Սպիտակ տան խոսնակ Ջոն Քիրբին։
«Պաշտպանության նախարարությունը հայտարարում է զգալի օգնության փաթեթի մասին՝ Ուկրաինայի երկարաժամկետ պաշտպանական կարողություններին աջակցելու համար»,- ասել է Քիրբին։
Նրա խոսքով՝ 200 միլիոն դոլարի չափով օգնության փաթեթն անհրաժեշտ է պաշտպանության ոլորտում Ուկրաինայի ծայրահեղ առաջնահրեթություն հանդիսացող կարիքներն ապահովելու համար։
Ըստ Քիրբիի՝ օգնության այս փաթեթը ներառում է Ուկրաինային օդային անվտանգություն ապահովելու համար անհրաժեշտ հնարավորություններ, հեռահար և հակատանկային զենքեր և սարքավորումներ, որոնք անհրաժեշտ են նախկինում ԱՄՆ-ի կողմից տրամադրված սարքավորումներն սպասարկելու համար։
Նա պարզաբանել է, որ փաթեթում ներառվելու են հակաօդային պաշտպանության միջոցներ, HIMARS զենիթային կայանքների զինամթերք և հակատանկային զինատեսակներ, այդ թվում՝ Javelin հրթիռներ։