Փարիզը պատրաստ է Օլիմպիական խաղերի մեկնարկին. կազմակերպիչները խոստանում են բացառիկ ու հիշարժան բացման արարողություն

ՓԱՐԻԶ, 26 ՀՈՒԼԻՍԻ, ԱՐՄԵՆՊՐԵՍ: Ֆրանսիայի մայրաքաղաք Փարիզում մեկնարկում են 33-րդ ամառային Օլիմպիական խաղերը` քառամյակի ամենակարևոր սպորտային իրադարձությունը: 

«Արմենպրես»-ի թղթակցի հաղորդմամբ`  Փարիզն ամբողջապես պատրաստ է խաղերի մեկնարկին և բացման պաշտոնական արարողությանը: Մայրաքաղաքի կենտրոնը ամբողջապես փակ է զբոսաշրջիկների համար, մուտքը միայն հատուկ հավատարմագիր և Խաղերին մասնակցություն ունեցող ազգային օլիմպիական կոմիտեների և մարզական լրագրողների համար է: 

Խաղերի բացման արարողությունը կկայանա Սեն գետի երկայնքով: Ազգային թիմերը մարզասերներին կողջունեն նավարկելով և կմիավորվեն մեկ կետում` Տրոկադերո հրապարակին կից: Պատվիրակությունները Սեն գետով 6 կիլոմետր երկարություն կանցնեն` 85 նավակներով: Պատմության մեջ առաջին անգամն է, որ խաղերի բացումն անցկացվում է հիմնական մարզադաշտից դուրս:  

Ամեն 4 տարին մեկ անցկացվող խաղերին (Կորոնավիրուսի համավարակի պատճառով նախորդ խաղերն անցկացվել են 2021 թվականին` Ճապոնիայի մայրաքաղաք Տոկիոյում), այս տարի մասնակցում է 10, 500 մարզիկ: 32 մարզաձևերում միմյանց դեմ կմրցեն 206 ազգությունների ներկայացուցիչներ, կխաղարկվի 329 մեդալային հավաքածու: Բացի Փարիզից, օլիմպիական մրցաշարեր կանցկացվեն նաև Ֆրանսիայի մի քանի այլ քաղաքներում: 

Փարիզը Լոնդոնից հետո երկրորդ քաղաքն է, որը երրորդ անգամն է հյուրընկալում Օլիմպիական խաղերը (1900, 1924, 2024): 33-րդ ամառային Օլիմպիական խաղերի բացման արարողությունը խորհրդանշական օր է, քանի որ 1924 թվականին խաղերի փակման արարողությունը կայացել է այդ օրը:

Պատմության մեջ առաջին անգամ Հայաստանը ներկայացնող մարզիկը` հրաձիգ Էլմիրա Կարապետյանը, մասնակցեց նաև օլիմպիական ջահի փոխանցումավազքին: 

Օլիմպիական խաղերի ոսկե մեդալը կշռում է 529 գրամ, արծաթե մեդալը` 525, իսկ բրոնզը` 455 գրամ: Մեդալների միջնամասում ամրացված են Էյֆելյան աշտարակից երկաթե կտորներ: 

Փարիզի Խաղերի թալիսմանը` մասկոտը, ստացել է Ֆրիգ (Phryges) անվանումը: Այն նման է ֆրանսիական գլխարկների և ունի կարմիր գույն: Ֆրիգիական գլխարկը համարվում է ֆրանսիական հեղափոխության և ազատության խորհրդանիշ:

Հայաստանը Փարիզի 33-րդ ամառային Օլիմպիական խաղերին կունենա 15 մասնակից` հրաձիգ Էլմիրա Կարապետյանը, մարմնամարզիկներ Արթուր Դավթյանը (հենացատկ), Վահագն Դավթյանը (օղակներ), ըմբիշներ Սլավիկ Գալստյանը (հունահռոմեական ոճ, 67 կգ), Մալխաս Ամոյանը (հունահռոմեական ոճ, 77 կգ), Արթուր Ալեքսանյանը (հունահռոմեական ոճ, 97 կգ), Արսեն Հարությունյանը (ազատ ոճ, 57 կգ), Վազգեն Թևանյանը (ազատ ոճ, 65 կգ), ծանրորդներ Անդրանիկ Կարապետյանը (89 կգ), Գարիկ Կարապետյանը (102 կգ), Վարազդատ Լալայանը (+102 կգ),  բռնցքամարտիկ Դավիթ Չալոյանը (+92 կգ), լողորդներ Արթուր Բարսեղյանը և Վարսենիկ Մանուչարյանը, աթլետ Երվանդ Մկրտչյանը: 

Ստորև ներկայացնում ենք Օլիմպիական խաղերում հայ մարզիկների ժամանակացույցը.  

Հուլիսի 27-ին` Էլմիրա Կարապետյան. հրաձգության որակավորման փուլ. հուլիսի 28-ին` եզրափակիչ: 

Հուլիսի 27-ին` Արթուր Դավթյան, Վահագն Դավթյան. մարմնամարզության հենացատկի և օղակների վարժությունների որակավորման փուլ:

Հուլիսի 27-ին` Վարսենիկ Մանուչարյան. լողի որակավորման փուլ և եզրափակիչ:

Հուլիսի 29-ին` Դավիթ Չալոյան. բռնցքամարտի որակավորման փուլի մեկնարկ:

Հուլիսի 30-ին` Արթուր Բարսեղյան. լողի որակավորման փուլ և եզրափակիչ:

Օգոստոսի 4-ին` Արթուր Դավթյան, Վահագն Դավթյանը. մարմնամարզության եզրափակիչներ:

Օգոստոսի 6-ին` Մալխաս Ամոյան, Արթուր Ալեքսանյան. ըմբշամարտի մեկնարկային գոտեմարտեր, եզրափակիչը` օգոստոսի 7-ին:

Օգոստոսի 7-ին` Երվանդ Մկրտչյան. աթլետիկայի 800 մետր վազքի որակավորում:

Օգոստոսի 7-ին` Սլավիկ Գալստյան. ըմբշամարտի մեկնարկային գոտեմարտեր, եզրափակիչը` օգոստոսի 8-ին: 

Օգոստոսի 8-ին` Արսեն Հարությունյան. ըմբշամարտի մեկնարկային գոտեմարտեր, եզրափակիչը` օգոստոսի 9-ին: 

Օգոստոսի 9-ին` Անդրանիկ Կարապետյան. ծանրամարտի մրցաշար:

Օգոստոսի 10-ին` Գարիկ Կարապետյան, Վարազդատ Լալայան. ծանրամարտի մրցաշարեր: 

Օգոստոսի 10-ին` Վազգեն Թևանյան, ըմբշամարտի մեկնարկային գոտեմարտերը, եզրափակիչը` օգոստոսի 11-ին: 

Վարվառա Հայրապետյան