«Ռուսհամագործակցությունը» Հայաստանում հուշարձանների հետ կապված հատուկ նախագիծ է իրականացնում

ԵՐԵՎԱՆ, 24 ՀՈՒԼԻՍԻ, ԱՐՄԵՆՊՐԵՍ։ Հայաստանում «Ռուսհամագործակցության» ներկայացուցչությունը «Հոգատարություն հիշողության համար» անունը կրող հատուկ նախագիծ է իրականացնում, որի շրջանակներում հայ-ռուսական հարաբերություններին և ընդհանուր պատմությանը նվիրված հուշարձանների տարածքների բարեկարգման և մաքրման աշխատանքներ են կատարվում։

«Արմենպրես»-ի հաղորդմամբ՝ այս մասին հայտնում է ՏԱՍՍ-ը՝ վկայակոչելով կազմակերպության մամուլի ծառայության հաղորդագրությունը։

«Այսօր մենք երեխաների հետ մաքրեցինք Հայրենական մեծ պատերազմի ժամանակ զոհված պիոներների հուշարձանը», - նշել է ծրագրի համակարգող, Հայաստանում «Ռուսհամագործակցության» ներկայացուցչության երիտասարդական ծրագրերի համակարգող Դավիթ Մալխասյանը։

Հաղորդվում է, որ նախագծին մասնակցում է «Ապագա զինվոր» ռազմահայրենասիրական կազմակերպության կամավորական ջոկատը։

«Կարևոր է հիշել և գնահատել մեր պապերի ներդրումն ընդհանուր ապագայի մեջ և այդ արժեքները փոխանցել գալիք սերունդներին։ Այս շաբաթօրյակները ոչ միայն օգնում են պահպանել հուշարձանները լավ վիճակում, այլ նաև նպաստում են երիտասարդների շրջանում հայրենասիրության և պատմության նկատմամբ հարգանք սերմանելուն»,- նկատել է Մարշալ Բաղրամյանի անվան վետերանների ասոցիացիայի նախագահ Սիմոն Եսայանը։

Կազմակերպության մամուլի ծառայությունը նաև հավելել է, որ նախագիծը միտված է ավանդույթների պահպանմանը, նախնիների ընդհանուր հիշողությունն ու սխրագործությունը հարգելուն։ «Հոգատարություն հիշողության համար» նախագիծը կշարունակի գործել՝ ներգրավելով երիտասարդներին ընդհանուր պատմական հիշողությունը պահպանելու կարևոր միջոցառումներին։