«Փարաջանով-100» խորագիրը կրող ցուցահանդեսը Գյումրիում կգործի մինչև սեպտեմբեր
1 րոպեի ընթերցում
![«Փարաջանով-100» խորագիրը կրող ցուցահանդեսը Գյումրիում կգործի մինչև սեպտեմբեր](http://armenpress.am/resized/480/storage/images/articles/2024/07/21/z5q1ostNVS3Ok0pKr5RHSuajt2szeQgjv8kuruAv.webp)
ԳՅՈՒՄՐԻ, 21 ՀՈՒԼԻՍ, ԱՐՄԵՆՊՐԵՍ: Գյումրու համայնքային ցուցասրահում բացվեց «Փարաջանով-100» խորագիրը կրող ցուցահանդեսը։ Ինչպես տեղեկացնում է «Արմենպրես»-ը, հայ մեծանուն կինոռեժիսոր, արվեստագետ Սերգեյ Փարաջանովի աշխատանքները Գյումրիում կլինեն մինչև սեպտեմբեր 9-ը։ Ցուցադրությունը նվիրված է արտիստի ծննդյան 100-ամյակին։
Ցուցադրությունը կազմակերպվել է «Կումայրի» պատմամշակութային արգելոց-թանգարանի և Սերգեյ Փարաջանովի թանգարանի հետ համատեղ։
Ցուցադրությանը ներկայացված են Փարաջանովի ճանապարհորդական խոհերը, ֆիլմերից դրվագներ, ընկերների դիմանկարները։
«Կինոռեժիսորի մոտ 50 աշխատանք ժամանակավորապես Գյումրի է տեղափոխվել Սերգեյ Փարաջանովի թանգարանից: Սրանք հիմնականում թանգարանի ֆոնդում պահված գործերն են։ Այս ընթացքում ցուցասրահում լինելու են նաև գիտական ընթերցումներ՝ նվիրված մեծանուն արվեստագետին»,- «Արմենպրես»-ին տեղեկացրեց «Կումայրի» պատմամշակութային արգելոց-թանգարանի տնօրեն Ինգա Ավագյանը։
Արմենուհի Մխոյան