Ճապոնիան իրականացրել է նոր հիպերձայնային պաշտպանական հրթիռի փորձնական արձակումը

ԵՐԵՎԱՆ, 10 ՀՈՒԼԻՍԻ, ԱՐՄԵՆՊՐԵՍ։ Ճապոնիան իրականացրել է իր մշակած հիպերձայնային պաշտպանական հրթիռի փորձնական արձակումը և հրապարակել է համապատասխան կադրերը։ Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, այդ մասին հայտնել է Ճապոնիայի պաշտպանության նախարարության ստորաբաժանումը և Ռազմավարական հետազոտությունների միջազգային ինստիտուտի պաշտպանական և ռազմական վերլուծական ծրագրի աշխատակից Թիմոթի Ռայթը։ 

Առաջին արձակումը տեղի է ունեցել 2024 թվականի մարտի 23-ին Կալիֆոռնիայում։

«Անցկացվել է հիպերձայնային հրթիռի (HVGP) նախնական փորձարկում՝ կղզիների պաշտպանության համար», - հայտնել է Ճապոնիայի գնումների, տեխնոլոգիաների և լոգիստիկայի գործակալությունը:

Ճապոնիան այս տարի հակահրթիռային պաշտպանության երկու փորձարկում է իրականացրել՝ մարտին և ապրիլին։ Փորձարկումների նպատակն է ստուգել չափիչ միավորները և իներցիոն ուղղորդման համակարգը: Ճապոնիայի պաշտպանության նախարարությունը չի հստակեցրել՝ երկու փորձարկումների ժամանակ մարտագլխիկը առանձնացվե՞լ է հրթիռի իրանից, թե՞ ոչ։

Հրթիռն արտադրողը ճապոնական Mitsubishi Heavy Industries ընկերությունն է։ Հեռահարությունը 500 կիլոմետր է, որը հրթիռն անցնում է բարձր հիպերձայնային արագությամբ։ Այն նախատեսված է վաղ փուլում հակառակորդի ուժերին հայտնաբերելու համար։ Ակնկալվում է, որ HVGP-ի տարբերակը, որը կոչվում է Block I, շահագործման կհանձնվի Ճապոնիայում 2026 թվականին: