2 րոպեի ընթերցում
ԵՐԵՎԱՆ, 10 ՀՈՒԼԻՍԻ, ԱՐՄԵՆՊՐԵՍ։ Նիդեռլանդները աշխատում է ԱՄՆ-ի, Գերմանիայի, Իտալիայի և Ռումինիայի հետ՝ ուժեղացնելու Ուկրաինայի հակաօդային պաշտպանությունը։ Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, այդ մասին հայտարարել է Նիդեռլանդների վարչապետ Դիկ Շխոֆը։
Ավելի վաղ Նիդեռլանդների վարչապետը երկրի պաշտպանության նախարար Ռուբեն Բրեկելմանսի և արտաքին գործերի նախարար Կասպար Վելդկամպի հետ միասին ժամանել էին Վաշինգտոն՝ ՆԱՏՕ-ի գագաթնաժողովին մասնակցելու՝ անցյալ շաբաթ պաշտոնը ստանձնելուց հետո Եվրոպայից դուրս իրենց առաջին ուղևորության շրջանակում:
Շխոֆն ասել է, որ անձամբ է հանդիպել Վոլոդիմիր Զելենսկու հետ ՆԱՏՕ-ի գագաթնաժողովում։
«Ես ևս մեկ անգամ հավաստիացրի նրան Նիդեռլանդների կողմից Ուկրաինային շարունակվող աջակցության մեջ այն ամենում, ինչ անհրաժեշտ է։ Օրինակ՝ Նիդեռլանդները աշխատում է ԱՄՆ-ի, Գերմանիայի, Իտալիայի և Ռումինիայի հետ՝ ուժեղացնելու Ուկրաինայի օդային պաշտպանությունը»,- ասել է Նիդեռլանդների կառավարության ղեկավարը:
Պաշտպանության նախարար Ռուբեն Բրեկելմանսն ավելի վաղ ՆԱՏՕ-ի գագաթնաժողովի ժամանակ հայտարարել էր, որ իր երկիրը լրացուցիչ 300 մլն եվրո կհատկացնի F-16 կործանիչների համար զինամթերք գնելու նպատակով, որոնք կուղարկվեն Ուկրաինա։