«Հեզբոլլահ»-ը հայտարարել է Իսրայելի շտաբները հրթիռակոծելու մասին

ԵՐԵՎԱՆ, 3 ՀՈՒԼԻՍԻ, ԱՐՄԵՆՊՐԵՍ: Լիբանանյան շիական «Հեզբոլլահ» շարժումը հրթիռներով Իսրայելի երկու շտաբների հարվածելու մասին հայտարարություն է տարածել: «Արմենպրես»-ի հաղորդմամբ՝ այդ մասին հայտնում է РИА-Новости-ն:

Նշվում է, որ «Իսլամական դիմադրություն» շարժման (Հեզբոլլահ) մարտիկները հուլիսի 3-ին «Կատյուշա» համակարգով 100 հրթիռ են արձակել Նաֆահի զորանոցներում գտնվող «Հոլան»-ի 210-րդ դիվիզիայի հրամանատարության շտաբի և Քալիա զորանոցներում դիրքավորված հակաօդային և հակահրթիռային պաշտպանության շտաբների ուղղությամբ»:

Իսրայելի պաշտպանության բանակը (ՑԱՀԱԼ) հունիսի 18-ին հայտարարել էր Լիբանանում հարձակման մարտական ​​գործողությունների ծրագրի հաստատման մասին: Դրանից հետո երկրի ԱԳ նախարար Իսրայել Կացը սպառնացել էր լայնածավալ պատերազմի հրահրման դեպքում ոչնչացնել «Հեզբոլլահ»-ը և լուրջ վնաս հասցնել Լիբանանին: Նա ընդգծել էր, որ Իսրայելը մոտ է այնպիսի որոշման կայացմանը, որը կփոխի կանոնները հյուսիսային ռազմաճակատում:

Իր հերթին, «Հեզբոլլահ»-ի գլխավոր քարտուղար Հասան Նասրուլլան հունիսի 19-ին հայտարարել էր, որ առճակատման հետագա սրման դեպքում շարժումը կարող է ներխուժել Իսրայելի հյուսիս:

Իսրայելա-լիբանանյան սահմանին իրավիճակը սրվել է 2023 թվականի հոկտեմբերին Գազայի հատվածում Իսրայելի ձեռնարկած ռազմական գործողություններից հետո։ Իսրայելական բանակը և լիբանանյան «Հեզբոլլահ»-ի մարտիկները ամեն օր փոխհրաձգություն են հրահրում սահմանի տարբեր հատվածներում։ Լիբանանի ԱԳՆ-ի տվյալներով՝ իսրայելցիների հրետակոծությունների պատճառով շուրջ 100 հազար մարդ ստիպված է եղել հեռանալ Լիբանանի հարավից։ Իսրայելական կողմը հայտնել է երկրի հյուսիսից մոտ 80 հազար բնակիչների հեռանալու մասին: