ԵՐԵՎԱՆ, 30 ՀՈՒՆԻՍԻ, ԱՐՄԵՆՊՐԵՍ: Ֆրանսիայում բացվել են Ազգային ժողովի (խորհրդարանի ստորին պալատ) ընտրությունների առաջին փուլի ընտրական տեղամասերը։
«Արմենպրես»-ի հաղորդմամբ՝ ինչպես հայտնում է ՏԱՍՍ-ը, քվեարկությունը կտևի տեղական ժամանակով ժամը 08:00-ից մինչև 18:00-ը, ներառյալ՝ արտերկրյա տարածքներում (օրինակ, Նոր Կալեդոնիայում քվեարկությունն արդեն ավարտվել է): Որոշ խոշոր քաղաքներում (Լիլ, Ռեն) քվեարկությունը կտևի մեկ ժամ ավելի, իսկ Փարիզում, Թուլուզում, Լիոնում, Բորդոյում, Մոնպելյեում և Մարսելում ընտրողները կկարողանան քվեարկել մինչև տեղական ժամանակով ժամը 20:00-ը:
Դեռ ընտրությունների մեկնարկից առաջ հարցումները կանխատեսում էին շատ բարձր մասնակցություն. առաջին փուլում մինչև 67 տոկոս։ Բացի այդ, մի քանի օր առաջ համացանցի միջոցով քվեարկել է արտասահմանում բնակվող 410 հազար ֆրանսիացի։ Երկիրն ունի նաև վստահված անձի միջոցով քվեարկելու հնարավորություն, որից 2024 թվականին օգտվել է 2,1 միլիոն մարդ, ինչը երկու անգամ ավելի է, քան 2022 թվականի խորհրդարանական ընտրություններում։
Ազգային ժողովում 577 տեղի համար հիմնական պայքարը ծավալվել է կենտրոնամետ նախագահական կոալիցիայի, աջակողմյան Ազգային միավորման և ձախակողմյան Նոր ժողովրդական ճակատի միջև։ Առաջին փուլում հաղթելու համար թեկնածուն պետք է ստանա իր ընտրատարածքում գրանցված ընտրողների առնվազն 25%-ի ձայների ավելի քան 50%-ը:
Հուլիսի 7-ին նշանակված երկրորդ փուլին մասնակցելու համար քաղաքական գործիչը պետք է ապահովի ընտրողների 12,5%-ի աջակցությունը։
Քվեարկության առաջին փուլի արդյունքները կամփոփվեն վերջին ընտրատեղամասերի փակումից հետո՝ Երևանի ժամանակով ժամը 22։00-ին։ Ֆրանսիայի ընտրական օրենսգիրքը խիստ արգելում է մինչև քվեարկության ավարտը էքզիթ փոլերի կամ այլ կանխատեսումների հրապարակումը։ Այս արգելքը խախտելու համար նախատեսվում է մինչև 75 հազար եվրո տուգանք: